سیچان پادشاهی نین پیشیگین قتلینه قصدی

سیچان پادشاهی نین پیشیگین قتلینه قصدی
و پیشیگین داردان قورتارماسی

چکدی قیلیج تا کی اؤزو پادشا،
تا ائله یه باشینی تندن جدا،
گؤردو پیشیک موش لرین شاهینی،
بیلدی اونون کینۀ دل خواهینی.
شیر کیمی چؤکدو دیزی اوستونه،
وئردی تکان شست ایله اؤز دستینه.
قیردی ایپی، سیچرادی اژدر کیمی،
حمله ائدیب موشه غضنفر کیمی.
چوخ سیچانی ائیله‌دی ظالم هلاک،
اولدی سیچانلار هامی سی سینه چاک.
حمله ائدیب رستم دستان کیمی،
غیظه (خشم) گلیب سام و نرایمان کیمی.
گؤردو سیچان شاهی کی دولموش اساس،
جانی هلاک اولماغین ائتدی قیاس.
گرز و گران الده یئتیشدی پیشیک،
گیرمه یه تاپمادی سیچان بیر دئشیک.
گرزو چالیب، ازدی اونون باشینی،
تپدی یئره قومونو، قارداشینی.
قاچدی سیچانلار، یئره اولدی نهان،
قالدی یئر اوستونده پیشیک حکمران.
کسدی، سیچانلار یولونو باغلادی،
“مو مو” ائدیب بیغلارینی یاغلادی.
باعث اودور کی، پیشیک اولدی عزیز،
خانیم اونا حرمت ائدر، هم کنیز.
نه اکینی واردی، نه دکانی وار،
هر گئجه گون حاضر اولان نانی وار
آش و پلو، دولما یئیر هر گئجه،
سرچه توتار، هیندن آپارار جوجه.
سن ده پیشیک اولسا ایدین، سیّدا،
چکمز ایدین روزی ایچون بیر بلا.