مصر شاه زاده لری

مصر شاه زاده لری

مصر ملکونده وار ایدی پیدا
ایکی شهزادۀ ستوده ادا.
بیری سی علمه اولدی بس طالب،
بیری سی دولته اولوب راغب.
بیرینه علم و فضل اولوب حاصل،
او بیری دولته اولوب واصل.
بیری سی عصره اولدی علامه،
بیری سی یئتدی دولت و کامه.
بیری آسوده ایدی راحت ایله،
بیری سی وار ایدی مشقت ایله.
بیر گون اول اهل ثروت و دولت
دئدی قارداشنا تاپیب خلوت؛
ای برادر، بو نه مشقت دیر،
بو نه علم و بو نه ریاضت دیر؟
سن گئدیب علم ائیله دین تحصیل،
ظاهر اولدی هزار جر و سقیل.
ندیر آخر بو علمدن مقصود؟
آتش فقردن چکیرسن دود.
اولموشام گؤر نه دولته واصل،
علمدن سنده یوخدو بیر حاصل.
آچدی درج دهانین اول فاضل،
بحر زخار و عالم کامل.
دئدی کیم، ای برادر احمق،
منه واجبدی شکر نعمت حق.
انبیا ارثینه منم وارث،
مندن آفاقه علم اولور حادث.
مُلک فرعونه سن ده وارث سن،
غم و آزار خلقه باعث سن.
من کی بیر پایمال اولان مورم،
شکرلر کیم، نه نیش زنبورم.