منو
پیشیگین قوشون توپلاماسی
پیشیگین قوشون توپلاماسی
یازدی خراسانه کی، گلسین سپاه،
عربده جو صف شکن و رزم خواه.
گلدی قوشون جوشن و خفتان ایله،
گرز گران، خنجر بران ایله.
دوشدی یولا لشکر جرارلار،
صف داغی دان فرقۀ خونخوارلار.
ایکی قوشون ساز اولوبان چکدی صف،
زهره چالیب چنگ، فلک وردو دف.
ایکی قوشون اولدی او گون روبرو،
خصم فکن، قلب شکن، کینه جو.
ایکی طرف دن اوجالب بانک کوس،
هر ایکی شه تختینه ائتدی جلوس.
سالدی سیچان عرصه یه بیر پهلوان،
اولدی رجزخوان او شیرین زبان.
سؤیله‌دی کیم، فارسی میدان منم،
بوغدا یئین، داغی دان انبان منم.
نئچه چواللاری من ائتدیم دئشیک،
کیمدی منه تای اولا ایت و پیشیک؟
کشتی نوح اوزره کی، دیو لعین
چکدی دونوز دالینا ناگاه الین،
آسقیریبان خوک، من اولدیم عیان،
کشتی نوحه ائله‌دیم چوخ زیان.
کیمدی بو میداندا منه تای اولا،
هانسی لعین دیر اوزومه لای اولا؟
فوج پیشیکده وار ایدی بیر جاوان،
آدی اونون ساری پیشیک، خوشزبان.
گؤردو سیچانین بو قدر لافینی،
گلدی دولاندی اونون اطرافینی.
قارغی آتی، قامچی سی بیر تیره تار،
تاختا قیلینج الده، ولی آبدار.
سؤیله دی:– ای دونقوزا اولاد اولان،
هرزه دانشما، بو ادادن اوتان!
کشتی نوح اوزره کی اولدین عیان،
سن گمینی دئشدین، ائدیردین زیان،
چکدی الین شیره چو نوح اول زامان،
آسقیریبان شیر، من اولدیم عیان.
سن دونوزون بورنونا منسوبسن،
پوخ یئین اوغلو، اؤزو معیوب سن!
بیل چاتارام شیره نجابتده من،
مشتحیرم زور و شجاعتده من.
حملۀ اوّلده سیچانی او پاک
تیغ چالیب، ائیله‌دی خوار و هلاک.
گلدی، مبارز طلب ائتدی یئنه،
سؤیله‌دی کی، کیمدی برابر منه؟
تا ائله ییم قانینا غلطان اونو،
خاکه قیلیم دهرده یکسان اونو.