اوغلوما نصیحت
واقف اول، ای نجیب و فرزانه،
لعن ائدیرسن همیشه شیطانه.
گرچی شیطانه لعن دیر شایع،
کیمه گؤر لعنتین اولور راجع،
هر ایشی ائیله دین اؤزون خلوت،
بیرجه شیطانه وئرمدین فرصت.
سونرا شیطانه لعنت ائیلرسن،
ماشاءالله، قیامت ائیلرسن.
دیمه سین گؤز، غریبه زیرکسن،
بو فراستده دهرده تکسن.
بیر بیان ائیله کی، هاچان شیطان
سنه بیر معصیت ده اولدی عیان؟
سن کی اولدین بو گونه مست وخراب
سنه شیطان نه وقت وئردی شراب؟
سنه شیطان هاچان اولوب ساقی،
سنه کیم وئردی بنگ و تریاکی؟
سنه شیطان نه وقت، ای دانا،
دئدی کی، گل گئدک سن ائیله زنا؟
اؤون (övn?)ائدرکن سنه او رب غفور
نیه شیطانه اولموسان معجور؟
سنی حق قیلدی فاعل مختار،
هر عمل قیلسان، اختیارین وار.
خیر و شر راهی دیر سنه معلوم،
گئتمه سن راه شرّه، ای مخدوم.
سنی حق شرّه ائتمهییب مجبور،
بو خیالات عقل دن دیر دور.
ائیله مز جبر کردگار سنه،
وئرمهییب صرف اختیار سنه.
اول خبردار کیم، حکیم و غنی
ائتمهییب نفسه واگذار سنی.
سن رهائیله جبر و تفویضی،
ائیلهمه پاک دینه تعریزضی.
قالما خیر و شرین گمانیندا،
سیر قیل خیر و شرّ میانیندا.
ایشله دن شرّی نفس انسان دیر،
خالق خیر و شر یزدان دیر.
شرّه باعث دئمه خدانی، اوتان،
یاخشی دان ظاهر اولماییبدی یامان.
اول حکیم و علیم و دانا دیر،
اؤزو زیبا و فعلی زیبا دیر.