حکایت

حکایت

گؤردو بیر مرد کیم، مگر شیطان
بیر اوچوق بقعه دن باخر پنهان.
اوزادیر باشینی، چکیر هر دم،
دئدی:– ای دشمن بنی آدم،
نیه مشغولسن، بو یئرده نه وار؟
دئدی:– آهسته ائیله کیم، گفتار،
نئچه گون لردی چکمیشم زحمت،
تاپمیشام بیر کیشیله بیر عورت.
ائتمیشم اونلاری بو گون اغوا –
کی، بو ویرانه ده ائدیلله زنا.
آز قالیب ایشلری تمام اولسون،
دئدی:– بو آد سنه حرام اولسون!
آدوی قویموسان عبث شیطان،
توتدوغون امر شیطنتدن اوتان!
نئچه گون زحمتیندن، ای رسوا،
ائده جک آخر ایکی شخص زنا؟
نه هنردیر بو، نه رشادت دیر،
سنه بو مایۀ خجالت دیر.
گؤر من ایندی نه ایش تمام ائدرم،
سنه شیطانلیغی حرام ائدرم.
دئدی:– گئت قوچّاغیم، گؤروم باری.
گئتدی اول شوم بیر اوبا ساری.
دئدی:– ای خانچوبانلی طایفه سی،
گؤرمه ییرسیز گلیر تفنگ سسی؟
سیزی اؤلدورمه یه باغیربئی لی
آتلانیب ال آیاغی چیرمک لی.
اونلارا چوخ یامان ایش ائیله میسیز،
بیر دانا قویروغو سیگیرلمی سیز.
بونلار آماده اولدی ائتمه یه جنگ،
کیمی خنجر گؤتوردو، کیمی تفنگ.
بونلاری حاضرائیله‌ییب یکسر،
او بیری قومه گئتدی وئردی خبر.
– ای باغیربئی لی! خانچوبانلی گلور.
بو یاووق دمده قانووز تؤکولور.
آند ایچیب لر تمام قرآنه،
بویاسینلار سیزی قزل قانه.
سؤزومه ائتمه سز اگر باور،
گؤندرین بیر نفر خبردن اؤتر.
هم بولار جنگه اولدی آماده،
دوردولار منتظر او صحراده.
دوشدی اول گون آرایه چرخچی لر،
عاقبت شعله چکدی آتش شر.
چکدی لر تیغ، تؤکدولر چوخ قان،
یوز نفر قانه اولدیلار غلطان.
گئتدی اول مرد گؤردو کیم، شیطان
هله ویرانه یه باخر الان.
دئدی شیطانه:– اوف، ای بدنام!
بیر زنا اولماییب هنوز تمام؟
گؤر کی، من توتموشام نه افسانه،
بویادیم عالمی بو دم قانه.
دئدی شیطان کی، ای سفیه و دغا،
من گرک بونلاری ائدم اغوا،
تا کی گلسین وجوده، ای بدنام،
سن کیمی بیر شریر نطفه حرام –
کی، بئله مصدر فساد اولسون،
فتنه انگیز و بدنهاد اولسون.
نئجه سابقده والدینوی من
ائتدیم اغوا، وجوده گلدین سن.