اوغلوما نصیحت

اوغلوما نصیحت

ای اوغول، خلقه سؤیلمه بهتان،
یاخشییا یاخشی اول، یامانه یامان.
اصلده یاخشی اولسا بیر دانا،
سن “یامان دیر” – دئمک دئیل زیبا.
توتالیم، سن گولی دئدین “بدبو”،
خلق سؤیلر کی، عقل سیزدیر بو.
سنه بیر یاخشی کیمسه اولسا یامان،
خلق اونی سؤیلمز یامان، ای جان.
یاخشیدیر اول کی، اصلی، بنیانی،
سن “یامان دیر” – دئسن نه نقصانی؟
سن دئدین کی، دئیل خلیفه عمر،
عمره بو کلامدن نه ضرر؟
سن دئدین کی، دئیل امام علی،
اولمادی ضایع احترام علی.
دئدی لر مصطفینی ساحردیر،
وار جنونی، سفیه و شاعردیر.
تاپمادی شأن مصطفی نقصان،
یاخشینی ائیله مک اولورمی یامان؟!