منو
انوشیروانین سئوالی
انوشیروانین سئوالی
بیر دفعه مجلسده انوشیروان بزرگمهردن سئوال ائله‌دی کی، ای حکیم روشن رأی، دنیادا نه شئی یاخشیدیر؟
حکیم دئدی کی، اؤلمک.
یئنه سئوال ائله‌دی کی، داخی نه یاخشیدیر؟
دئدی کی، عورت.
اوچونجو دفعه سئوال ائله‌دی کی، داخی نه یاخشیدیر؟
دئدی کی، احتیاج.
انوشیروان غضبناک اولدی. دئدی کی، نه سببه، حکیم دانشمند؟
دئدی کی، ای پادشاه، اگر موت اولماسایدی، والید ماجیدین وفات ائتمز ایدی، سنین کیمی عدالت لی اولان پادشاه صاحب اختیار اولمازدی. و اگر عورت اولماسایدی، سنین کیمی سلطان صاحب وقار و مدلت شعار دنیایا گلمزدی. و اگر احتیاج اولماسایدی، بیزیم کیمی حکیم لر سنه خدمت ائتمزلردی. بس موت، عورت، احتیاج – هر اوچو نعمت عظما دیر. انوشیروانا حکیمین بیاناتی نهایت خوش گلدی و انعام عطا قیلدی.