بیر کیشی نین مجنونا ایرادی

دئدی مجنونا بیر نفر جاهل:
ای قیلان عشقی عقلینی زایل!
او قدر کی، گؤزه ل دئیل لیلی –
کی، اونا چوخدو کؤنلوون میلی.
لیلی نین بیر لطافتی یوخدور،
اوندان اعلا گؤزه ل صنم چوخدور.
چکدی مجنون سینه دن بیر آه،
دئدی:– ای حاله اولمایان آگاه،
رخ لیلایه، ای نیکو منظر،
چشم مجنون ایله سن ائیله نظر.
گؤره سن تا جمال لیلانی،
تور کویین دکی تجّلانی.
اولاسان محو اول تجّلاده،
گؤره سن حُسن حقی لیلاده.
گرچی وار کؤنلومین اونا میلی
اهل حسنون او گولدو سرخیلی.
مطلبیم لیلی یه حقیقت دیر،
مشربیم شیوۀ محبت دیر.
بیلسه ایدین حقیقت، ای جاهل،
هیچ بیلمزدین عقلیمی زایل.
عشق دیر هر نه وار عالمده،
سن ده اول عشقه یار عالمده.
سیّدا، عشقه اقتدائیله،
عشقی توت، ترک ماسوائیله.
مطلبین گر نعیم سرمد دیر،
سنه معشوقه بیل، محمد دیر.
آفتاب سماء، مه بطحاء،
شاه امّی، معلم اسماء.
زوبدۀ جملۀ بنی آدم،
اونا اولسون سلام لر هر دم!
جان و دلدن او شاهه اول طالب،
عشق آل محمده راغب.