ایتله پیشیگین صحبتی

ایتله پیشیگین صحبتی

بیر پیشییه ایت دئدی:– ای بی حیا،
ائوده ائدیرسن گئجه گوندوز صفا.
سفره کناریندا یئییرسن طعام،
کورسولر اوستونده توتورسان مقام،
ائیله یئییرسن گئجه‌لر آش سن،
صبح یئییرسن یئنه بوزباش سن.
سن نه سبب بؤیله عزیز اولموسان،
کیم ائله‌ییب حکم تمیز اولموسان؟
سؤیله، آغایه نه اولوب خدمتین،
واجب اولوبدور بو قدر حرمتین؟
ائیله ییرم صبحه کیمی من فغان،
دولت و ماله اولورام پاسبان.
من چکیرم صبح اولونجا کئشیک،
هرگز ایته تای دئیل دیر پیشیک.
چوخ گئجه وار کی، یاتیرام آج من،
درد ایله بیر لقمه یه محتاج من.
گئتمه ییرم اؤزگه یئره نان ایچون،
صبر ائدیرم محنت پنهان ایچون.
گرچی آغا دؤیسه منی، قاچمارام،
هر یئتنه درد دلیم آچمارام.
موشقورا هرگاه، بولارام قویروغو،
تا کی آغانین نه اولا بویروغو.
جمله جاهان مردمی، ای بد عمل،
ائتدی وفاده منی ضرب المثل.
ایندی بیان ائیله منه حالینی،
تا کی بیلیم صورت احوالینی،
گؤر پیشیگی کیم، ایته وئردی جاواب،
سؤیله دی:– حق دیر بوعتاب و خطاب.
هر نه دئدین حقدو، یوخدور خلاف،
سؤزلروون بیری دئیل دیر گزاف.
لیک سنه قوی ائلییم من بیان،
صورت احوالینی، ای باغری قان.
حالووه اول ایندی خبردار سن،
بیل نه سببدن بئله مردارسن.
خیر ایشه منّا سن، ای بولهوس،
ایستمه سن خیر آپارا هیچ کس.
گر گلیبن سایل ائده نان طلب،
سن ائلییرسن اونا قهر و غضب.
دامنینی پاره قیلیرسان اونون،
سن گونونو قاره قیلیرسان اونون.
وئرسه خانیم سایله بیر پارچا نان
غیظ له جانین چیخار، ای بدگمان.
جمله بو عالم باشنا دار اولور،
روشن اولان دهر سنه تار اولور.
مانع خیر اولما داخی، سیّدا،
قوی قاپی دان خیر آپارسین گدا.
ایت کیمی توتما داخی دامانینی،
راحت ائله اهل طلب جانینی.
مانع اولان خیر ایشه بد ذات دیر،
آیه ایله بیج لیگی اثبات دیر.
حق اونا مؤطل(mövtəl) بویوروب، هم زنیم (zənim)،
شاهد گفتار “اطولون زنیم”.
کیمسه کی، بیر خیر ایشه منّا اولا،
دیمز اونون وارلیغی بیر پولا.
چوخدو حدیث ایله بو امره دلیل،
عابد اولا جنّته گئتمز بخیل