منو
قاری نین پیشیگی
قاری نین پیشیگی
بیر قاری نین بیر پیشیگی وار ایدی،
لاغر ایدی، صورت دیوار ایدی.
چون یوخ ایدی قاری ائوینده طعام،
درد چکیردی او پیشیک صبح وشام.
چونکی یوخ ایدی او سرا ایچره نان،
هیچ تاپیلمازدی او ائوده سیچان،
دولان دیرا موش ایله تا باشینی،
تؤکمه یه گؤزدن یئره قان یاشینی.
چیخمیش ایدی دامه قضادن پیشیک،
روزی ایچون چکیردی هر یان کئشیک.
بلکه دوشه بیرجه قارانقوج اله،
تا یئییبن لقمه نی جانه گله.
حسرت ایله پیشیک چکیردی کئشیک،
گؤردو گلیر نئچه قوی، کؤک پیشیک.
یالواریب عرض ائیله‌دی اول بینوا
ای سیزه اولسون بو بلاکئش فدا،
سیز نه سبب بؤیله کؤک و چاغ سیز،
باشدان آیاق قویروق سوز، یاغ سیز،
دیشلریوزدور نئجه دُرّ سمین،
یوخسا یئییرسیز گئجه ایجل(داغ کئچی سی) سمین؟
من گئجه‌لر تاپماییرام بیر سیچان،
هم یوخدا گؤرمه ییرم بوی نان.
سؤیله‌دی لر:– بیز گئدیب، ای بدنیت
مطبخ خاندا یئییریک آش و ات.
بیزیم ایله گل گئدک ضیافته،
سن ده یئیب آش و پولو گل اته.
غارت ائدک یاغلی قوورمالاری،
باشا چکک فیرنی و دولمالاری.
قوز لپه سی، یاغلی فسنجانی گؤر،
سفره یه باخ، نعمت الوانی گؤر.
وقتوه، گئت اول داخی آماده سن،
بیر کئف ائله عمرده دنیاده سن.
گلدی ائوه، اول گئجه یاتدی پیشیک،
صبحون آچیلماغینا چکدی کئشیک.
قاری پیشیک سارییا ائتدی نگاه،
گؤردو چکیر حسرت ایله دود آه.
گؤردو پیشیکده گؤرونور بیر خیال،
قاری بونون وجهینی ائتدی سئوال.
آچدی زبان، دئدی پیشیک:– ای قاری،
کؤکدو پیشیک لر هامی سی ائلجاری،
بیرجه اولان دهرده لاغر منم،
رگ لری بیر رشتۀ مسطر منم.
دامه دونن چیخمیش ایدیم صید ایچون
منتظر اولدیم بو صفت عید ایچون.
دوشمه‌دی بیر دانه قارانقوج اله،
سرچه ایچون قورموش ایدیم بیر تله.
اولمادی اصلا منه بیر قوش شکار،
تا ائله ییم صید اونی من آشکار.
حسرت ایله دامدا چکیردیم کئشیک،
گؤردوم او اسناده نئچه کؤک پیشیک،
یاغ سالیب جمله باغلاییب گؤبک،
هر بیری یاغ ایله دولان بستی تک.
صیقل اولوب توک لری شفاف ایدی،
آینه تک چشم لری صاف ایدی.
هر بیری صولتده نئجه نرّه شیر،
بیغلاری نین هر بیری سی بیر نفیر.
پنجه‌لری زورده آسلان کیمی،
هر بیری بیر اژدر غضبان کیمی.
هر بیری سی رزم گونی بیر پلنگ،
فیل بدن، ببرلقا، شیرجنگ.
یالواریبان اونلاری ائتدیم صدا،
کئی سیزه اولسون دل و جانیم فدا!
من ده سیزین جنسینیزم آشکار،
بس الیمه دوشمییر آخر شکار.
بیر قاری نین خانه سیدیر منزلیم،
اولماییر اول خانه ده حل مشکلوم.
خانۀ قاریده تاپیلمیر سیچان،
گلمییر اول ائوده منه بوی نان.
سؤیله‌دی لر لطف ایله:– ای بینوا،
قاری ائوینده هانی برگ و نوا؟
بیز گئدیریک مطبغ خانه سحر،
ائیله ییریک خانه آرا کر و فر.
آش و پلودان اولوروق کامیاب،
یاغ لی فتیرلر یئییریک، هم قوتاب.
سن ده بیزیمله سحرائیله سفر،
تا اولاسان بیز تکی سن بختور.
فکریم اودور من ده اولارلا سحر.
مطبخ خانه ائلییم تا گذر.
بلکه کی، آغزیم چاتا بیر لذته،
من ده گلم آش و پلودان اته.
بیرجه گؤروم طعم فسنجان ندیر،
ماهی ندیر، برۀ بریان ندیر.
قاری پیشیک دن کی، ائشیتدی جاواب،
آچدی نصیحت دلین اول نکته یاب،
سؤیله دی:– ای مونس جانیم پیشیک،
جسمیم آرا روح روانیم پیشیک،
کیم کی، طمعکار اولور – خوار اولور،
محنت عظمایه گرفتار اولور.
کنج قناعتده‌دی گنج روان،
اولگیلن اؤز گنجوه سن پاسبان.
رسمدی کیم، گنج اولو ویرانه ده،
دُرّ سلامتدی بو کاشانه ده.
قانع اولان عالمه سلطان اولور،
طامع اولان خاک ایله یکسان اولور.
ائیله‌مه سن مطبغ خانه گذر،
قورخوم اودور واقع اولا بیر خطر.
قاری نه قدر ائتدی نصیحت اونا،
ائتمه‌دی تأثیر بو حکمت اونا.
یاتدی گئجه، چیخدی سحر آفتاب،
خان فلکده گؤرونوب اول قوتاب.
مطبخ صبحون دری اولدی فراز،
ائیله‌دی تباخ قضا طبخ ساز.
یاتمامیش ایدی پیشیگی قاری نین،
فکری وار ایدی دل افکاری نین.
گلدی پیشیک لر، اونی ائتدی صدا،
گلدی قولاغینه صدا آشنا.
سیچراییبان چیخدی پیشیک خانه دن،
شست ایله اول خانۀ ویرانه دن.
ائتدی هامی مطبغ خانه شتاب،
دوشدی یولا بیر نئچه تیر شهاب.
مطبخ خانه وار ایدی بیر دئشیک،
گیردی دئشیک دن هامی فوج پیشیک.
گیردی باجادان ایچری ائلجاری،
میر ها میر و سالیبان هر ساری.
چنگه‌لرین آچدی هامی غارته،
دوشدی خلل یاغه، پنیره، اته.
کارینی گؤرموشدو چو حکم قضا،
وار ایدی ظاهر خلل ما مزا.
گلمیش ایدی تنگه او مطبخ نواز،
ائتمیش ایدی ساز نئچه تیر ساز،
مطبخه تا ائتسه پیشیک لر گذر
ائیله یه‌لر تیرایله زیر و زبر.
کئشیکچی لر قویدو کمانه اوخو،
پیشیک لرین قاچدی باجادان چوخو.
توللانا بیلمز پیشیگی قاری نین،
لاغر ایدی جانی او بیماری نین.
کنجه سیخیلدی، دئدی کی، ای خدا!
اولسام اگر بو اوخاطاندان رها،
تیشرایا چیخسام داخی ویرانه دن،
بسدی منه ماحضر پیرزن.