بیر عربین معاویه یه قوناق اولماسی

ابن سفیانه شامده بیر شب
مهمان اولدی بیر فصیح عرب.
قوزو بریانی دزدولر خانه،
اول عرب اکل ائدیردی شیرانه.
قوزونون پارچالاردی اعضاسین،
سیندیریب کلّه سین، قابیرقاسین.
بونو چون گؤردو زادۀ سفیان،
دئدی کیم، ای رشید اولان مهمان!
بو قوزویلا خصومتین وار ایمیش،
گؤرونور کیم، عداوتین وار ایمیش.
سنی بوینوزلاییب آتاسی بونون،
یا کی بیر خیش و اقرباسی بونون؟
دئدی کیم، ای خلیفۀ دوران،
اولدی بریانه خاطرین بریان؟
بس سنه سود وئریب آناسی بونون،
یوخسا یوخدور بیر اقتضاسی بونون؟
بو حکایت دن اؤتدو بیر ساعت،
یئنه تاپدی معاویه فرصت.
دئدی:– لقمه نده، ای عرب، توک وار،
ائیله‌مه غفلت، اولگیلن هوشیار.
لقمه نی سالدی، دوردو مرد عرب،
سانکی دیوانه اولدی، ائتدی غضب.
یئمه‌ییب، بزمدن چیخیب گئتدی،
ابن سفیانی شرمسار ائتدی.