خلیفه و بهلول

خلیفه و بهلول

ائتدی هارون بیر گون عزم شکار،
گلدی دریا کنارین ائتدی قرار.
گؤردو بیر ال چیخیبدی دریادن،
دوشدیلر حیرته تماشادن.
بئش عدد بارماق اولموش اوندا عیان،
بو معمایه قالدیلار حیران.
آتدیلار گرچی خیلی توپ و تفنگ
لیک بارماقلار اولمادی منفک.
کیمسنه بیلمه‌دی بو اسراری،
قالدیلار شاه مات ائلجاری.
دئدی لر کیم، بونو بیلر بهلول،
بونو ائیلر طلا کیمی محلول.
شاه بهلوله قاصد ائتدی روان،
تا گلیب ائیله سین بو رمزی بیان.
اولدی بهلول قارغی آته سوار،
سئیره ده سئیره ده گلیب رهوار.
ائتدی لر تا کی ماجرانی بیان،
ایکی بارماغینی بو ائتدی عیان.
گؤرجک اول ال چکیلدی دریایه،
قالدیلار مات بو معمایه.
دئدی بهلوله شه کی، ای دانا،
بو نه ایشدیر، بونا ندیر معنا؟
نه ال ایدی او کیم، عیان اولدی،
سن کی ال توتدون اول نهان اولدی؟
بو رموزون نه ایدی معناسی،
نه ایدی اول اشاره ایماسی.
دئدی بهلول:– ای شه دوران.
او کی بئش بارماق اولموش ایدی عیان،
او اشاره ائدیردی، ای سرور،
نه قدر کی، چتین اولا ایشلر،
بئش کؤنول اولسا جمع، آسان دیر،
جمع لیک دن عدو پریشان دیر.
ایکی بارماغیمی من ائتدیم عیان،
ائیله‌دیم من اونا بو رمزی بیان،
یعنی کی، بو جاهاندا ایکی کؤنول
جمع اولا، خیلی امردیر مشکل.
بیلدی معنانی، باتدی دریایه.
سیّدا، آفرین بو انشاءیه!