حضرت عیسی نین حکایتی

حضرت عیسی ایله بئش اون نفر
بیر گون و بیر یئردن ائدیردی گذر.
گؤردوله بیر قورد دوشن ایت دوشوب،
جمله قوتور اندامی یکسر شیشیب.
بوی عفونت وئریر اول میییته،
سؤیله‌دی لر:– بیرجه باخین بو ایته!
بیری دئدی:– قورد دوشوب اندامینا،
بیری “قوتور” دئدی اونون نامینا.
بیری دئدی، گؤر کی، نه بد بویی وار!
زردابی وار، زهر کیمی سویی وار.
هر بیری بیر نوع اولوب عیب جو.
سؤیله‌دی روح الله پاکیزه خو:
وه، نه گؤزه ل، دور کیمی دندانی وار،
درج صدفده دور غلطانی وار.
دور وار ایدی اوندا، ائدیب دیر ظهور،
چیخدی قوتوردان داخی لفظ قوتور.
هر نه اولا کوزه آرا اندرون،
وقت ترشحده چیخار اول بیرون.
حضرت عیسی ده وار ایدی گوهر،
ساحله دور وئردی او دریا اثر.
گرچی سنین ده هنرین واردیر،
گؤر گلونو، باخما اونا خاردیر.
اولما اول اشخاص کیمی عیب جو،
حضرت عیسی کیمی اول نیک خو.
آچما بو مسگر دوکانین، سیّدا،
باشلا سؤزو، ائیله‌دی هاتف ندا.