داستانین یازیلما سببی

داستانین یازیلما سببی

دون بیرینه نقل ائله دیم، ای فلان،
ایستییرم نظم اولا بیر داستان
گوربه ایله موش حکایت لرین،
جنگ و جدل، مکر و عداوت لرین،
تا کی اوشاقلار اولا راغب اونا،
طبع سلیمی اولا جاذب اونا.
طعنه اوزوندن منه وئردی جاواب،
سؤیله دی:– کئی شاعر والانساب،
یوخسا نهایتدی کلامین سنین،
باده سی یوخ، خالیدی جامین سنین.
طرفه غزل لر تاپیب انشاء ائله،
وصف غزالان دل آرا ائله.
نرگس شهلالری، توصیف قیل،
زلف مطرالری تعریف قیل.
سؤیله ندیر قایدۀ مثنوی،
بسدی بیزه مایدۀ مولوی.
گر هنرین وار، غزل دن دانش،
یاره نظر ائیله، گؤزه ل دن دانش.
گوربه ندیر، موش ندیر، آی کیشی؟
شاعر اولانین ندیر اوندا ایشی!
گؤردوم اونی آنناماییب مطلبی،
اؤزگه مذاق ائیله‌دی چون مشربی.
عجز ایله عرض ائیله دیم، ای سرفراز،
ائتمه منه طعنه زبانین دراز.
شاعر اولان کسده هر احوال اولور،
بوستان آرا دیمیش اولور، کال اولور.
دورّ اولان یئرده اولور هم صدف،
کاسۀ فغفور اولور، هم خزف.
گلشن آرا گل ده اولور، خار اولور،
نور اولور، عالم آرا نار اولور.
یاخشی ایچینده نولا اولسا یامان،
گنج اولان یئرده اولور هم ایلان.
دکۀ عطاره‌دی شاعر حساب،
خار و خسک، هم اولو عطر و گلاب.
ائتمه منه عیب بو احوالی سن،
اهلیمیزن دانشینه حالیسن.
یوز چکه سن رشته یه دورّ و گوهر،
یوخدو خریدار اونا بیر نفر.
گوهره وار ایدی خریدار اگر،
ایچدی فضولی نیه خون جیر.
بنگ ندیر، باده نی نظم ائیله دی،
بوزۀ دلساده نی نظم ائیله دی.
شاعر بغداد، او شیرین خطاب،
زاهد ایله رینده یازیب بیر کتاب.
شعرده لازم دیر اولا طیبات،
شعردو، ماهیم، بو دئیل معجزات.
سحر حلالیمدی بو سؤزلر منیم،
فیض کمالیمدی بو سؤزلر منیم.
وار امیدیم عرفا ائتسه گوش،
ذِیل کرمله اولالار عیب پوش.
بی هنر اشخاص اولور عیب جو،
عیب ائله مز کیم کی، اولا نیک خو.
چشم بد اندیشی گؤروم کور اولا!
شبپره تک گؤزه‌لری بی نور اولا!
ایستمز عالمده اولا آفتاب،
گئجه سئور، گوندوزی گؤرمز ثواب.
بیر هنرین گر اولا، هفتاد عیب،
دوست گؤرر اول هنری، یوخدو ریب.
عیب بیلر فضلینی اهل غرض،
چونکی اونون وار اوریینده مرض.
ذات خبیسییه تقاضا بودور،
حکمت خلاقده معنا بودور.