حاجی و موللا احوالاتی

حاجی و موللا احوالاتی
کؤپه یه احسان

وار ایدی شاهسئونده بیر حاجی،
شاهسئون لر تمام محتاجی.
صاحب دولت ایدی چوخ اول کس،
ناق و گوسفند و چوخ لو فرس.
واردی بوزلار آدیندا بیر کؤپیی،
قویونون پاسبانی، آت کمکی.
از قضا، بیر گون اؤلدو بوزلاری،
اولدی حاجی اونون عزاداری.
ائدیبن غسل، حاضر ائتدی کفن،
عزت ایله گؤتوردو چوخ یئردن.
قازیب اهل قبور ایچینده مزار،
اولدی مدفون قبر آرا بوزلار.
وئردی بوزلارا یئددی گون خیرات،
ایسته‌دی حقدن اونا حسنات.
حالی اولموش بو حاله بیر موللا،
چکدی فریاد، قیلدی واویلا.
دئدی:– وا ملتا! ندیر بو خطا،
ضایع اولدی شریعت غرّا.
دیندن چیخدی بو گروه عوام،
بر طرف اولدی حرمت اسلام.
ایت ندیر، دفن و کفن و قبرستان،
گئتدی الدن شریعت و قرآن.
میندی بیر آت موللا، دوشدی یولا،
تا گئدیر محشر ائیله سین برپا.
چاتمامیشدی هنوز او حیلت گر،
وئردی لر حاجییه بو حالی خبر –
کی، فلان موللا قیل و قاله گلیر.
دئدی:– یوخ، اؤزگه بیر خیاله گلیر.
سرودن تئز آییردی اللی قویون،
دئدی:– سیز بونلاری یول اوسته قویون.
اؤزو چیخدی اونون قاباغینه،
موللانین کئچدی سول و ساغینه.
دئدی:– ای نایب امام زمان،
سنه اولسون آتام آنام قربان!
اؤلدو بوزلار، آه، سیندی بئلیم،
کاش گؤزوندن باتایدی جمله ائلیم.
نئجه بوزلار، او چابک و هوشیار،
پنجه دن شیر و یئلگه دن کافتار.
جاناوار اوندان ائیله قورخاردی –
کی، صداسین ائشیتجک آغلاردی.
حافظ خیل و پاسبان رمه،
گئجه گوندوز اولان شبان رمه.
صاحب دولت ایله مالیم ایدی،
باعث ثروت و جلالیم ایدی.
چوخ ایدی گردنیمده حقی منیم،
دئدی:– اولسون حریردن کفنیم.
هر وصیت کی، ائتدی قیلدیم عمل،
بیر وصیت سیزینچون ائتمیش ازل.
سؤیله‌ییب سیز جنابه اللی قویون،
دئمیشم اونلاری یول اوسته قویون.
قویون آدین ائشیتدی چون موللا،
دئدی:– احسن بو حاله، نام خدا!
ایت دئمه، اول داخی بیزیم بیریمیز،
بئله اؤلموش لره فدا دیریمیز.
رحمت حقه اول دچار اولسون،
سگ اصحاب کهفه یار اولسون!
اوخویوب صدق ایله اونا یاسین،
اؤزو ده ساخلادی اونون یاسین.