باغدادلی نین واقعه سی

باغدادلی نین واقعه سی

بیر کیشی شکوه قیلدی مأمونه –
کئی چاتان حکمی رُب مسکونه،
یوز قزل، ای شه زمین و زمن،
وئرمیشم بیر کسه امانت من.
ایندی گئتدیم طلب قیلام دینار،
ائتدی انکار قیلدی هم منی خوار.
دئدی مأمون:– یات ائوینده بو شب،
صبح گئت قاضی دن زر ائیله طلب.
قورخما، دیناروی ادا ائیلر،
کؤنلوون مطلبین روا ائیلر.
گر او وئرمزسه، من ادا ائدرم،
مطلبی مقصدین روا ائدرم.
شه گئجه قاضینی قیلیب مهمان،
گلدی یوز گونه نعمت الوان.
گلیبن مجلسه او حورنژاد،
دئدی اول پادشاه نیک نهاد –
کئی، وجودون تفاخر اسلام،
مشرق و مغربه امام انعام،
ای امامن مثال قُبّۀ نور،
وی سؤزون وحی، بزم خاصین تور.
قاضی چرخ امامنه بی شک
کهکشانین گتیردی تحت الحنک.
دانۀ سبحن، ای امام زمن،
هر بیری بیر ستارۀ روشن.
پر عمران کیمی الونده عصا،
“مبطل السِحْر”* اژدهای خدا.
خاک نعلینین، ای نبی رفتار،
سورمۀ دیدۀ اولول ابصار.
سن کی هر امره ائیله دین فتوا،
قاضی چرخ هم ائدر امضاء.
حکموون تابعی قضا و قدر،
بندۀ درگهین چی خشک و چی تر.
اؤزگه یئرلرده وار داخی قاضی،
بیر کس اوندان ولی دئیل راضی.
سن بو گون دوشموسن زمانه ده تاق،
عقل ایله جفت و شهرۀ آفاق.
نه کی تنها فراستین واردیر،
هم امانت دیانتین واردیر.
نه قدر خلقی ائیله‌دیم تخمین،
تاپمادیم بیر سنه برابر امین.
نایب شرع مصطفی سن سن،
وارث علم اولیا سن سن.
بو سببدن من، ای فلک رفعت،
بو گئجه وئرمیشم سنه زحمت –
کی، اگر ائیله سن قبول، سحر
سنه یوز کیسه گؤندریم من زر.
بیر اؤزون بیلدیگین یئره آنی
قویاسان قالا سنده پنهانی.
گردش چرخده اگر ناگاه
آل عباسین اولسا حالی تباه،
گئده بو تخت و جاه و شوکتیمیز،
چیخا الدن بو مال و دولتیمیز،
آل عباسی ائت سوراق، اگر
تاپیلا بیر فقیر و بی یاور،
وئر او زردن اونا به قدر کفاف،
اولماسینلار زمانه ده اجلاف.
چون بو گفتاری قاضی ائیله‌دی گوش،
شوقدن اولدی واله و مدهوش.
دئدی کؤنلونده کیم، بو احمق دیر،
بونون احمق لیگی محقق دیر.
نقدی آللام، اونی من آللادارام،
نسیه سؤزدور، بالیق تکی اودارام.
دئدی قاضی کی، شاهه صد احسن!
نه گؤزه ل فکر بکر ائیله میسن.
ماشاء الله بو فکره، نام خدا!
سانکی نازل اولوب کلام خدا.
بئله ده فکر اولور، بئله انجام،
سنه بو غیبدن اولوب الحام.
شاه اولان بؤیله فکر بکر ائیلر،
عیبی یوخ، ساخلارام، سحر گؤندر.
دوردو قاضی شهی وداع ائتدی،
ائوینه خیلی شادمان گئتدی.
او گئجه یاتمادی سروریندن،
اینجینیردی ستاره نوریندن.
هر نفس وئردی خالق الاصباح،
اوخویوب صبحه دک دعای “صاباح”،
بس کی ائیلردی صبح ایچون تعجیل،
هر دقیقه اونا گلیردی بیر ایل.
صبح کیم، آفتاب زرین تار،
چیخیبان زرین ائیله‌دی اظهار،
گلدی قاضی اوتوردو مستانه،
منتظر چشمی گنج پنهانه.
یئنه اول شخص گلدی، وئردی سلام
و علیک السلام، والاکرام.
هارا گئتدین دونن چیخیب، آ کیشی؟
داخی من بعد توتما بؤیله ایشی.
بیزده قالدی دونن امانتووز،
بلکه واردیر او نقده حاجتووز.
ای مبارک، گتیر او همیانی،
منتظر قویما بو مسلمانی.
گئدیب اول کیسه نی گتیردی غلام،
وئردی اول شخصه قاضی اسلام.
قورخدو کیم، وئرمه یه او سیم و زری،
چاتاجاق دیر خلیفه یه خبری.
اونو بیلسه خلیفه ار** خاین،
اونا اولماز بو ایشده آرخایین.
گؤزونو دیکدی شاه دولتینه،
منتظر قالدی مال و ثروتینه.
شاهی اول مرد ائیله‌ییب آگاه –
کی، وصول اولدی قاضی دن تن خواه.
شاه گؤندردی قاضییه پیغام –
کی، ایا قاضی رفیع مقام،
ای وجودی جاهاندا مایۀ آز،
چوخ امیدیله چیخدی الدن آز.
وعده یوز کیسه چون اولوب تقریر،
چیخدی بیر کیسه سندن، ای بی پیر!
سونرا مین کیسه زر گرک دیر دوز،
آلاسان تا چیخا الیندن یوز.
آفرین، ای یگانۀ اخیار،
سن تک اولماق گرک امانتدار.
بیلدی اؤز سهوینی او دم قاضی،
وئرمه‌ییب سود کردۀ ماضی.
—————————–
* سحری باطل ائدن
** اگر