پیشیگین تعریفی

بیرجه پیشیک وار ایدی کرمانده،
صولتی یوخ ببرده، اصلانده.
گؤزه‌لری سارییدی، نئجه کهربا،
یئلگه سی شیره و اؤزو بیر اژدها.
گردنی آغ، بوینو مثال قوتان،
بیر نفسه سرچنی یوز مین توتان.
دیرناغی عزرایله چنگال ایدی،
بیغلاری بیر بورغویا تمثال ایدی.
آغزی یکه، قویروغو مثل ایلان،
افعی کیمی خشم ایله آدم چالان،
تولکو کیمی باشدان آیاغ حیله گار،
سانکی توکوندن تؤکولور زهر مار.
سینه سی قاقوم کیمی چوخ آغ ایدی،
قوس قزح کیمی قاشی طاق ایدی.
دیش لری نین هر بیری بیر نیشتر،
خنجر فولاد کیمی تیزتر.
قارنی یکه، طبل کیمی پرصدا،
خطۀ کرماندا نئجه کتخدا.
ائوده گلین لرله یاتاردی مدام،
گوندوز آغالارلا یئیردی طعام.
یایدا یوک اوستو اونا یایلاق ایدی،
کورسولر آلتی اونا قیشلاق ایدی.
بیر بو صفت گوربه کی وصف ائیله دیم،
وصفینی نظم ایله سنه سؤیلدیم،
گیردی شرابخانه یه بیر گون پیشیک،
تا کی سیچان توتماغا چکدی کئشیک.
پوسقو ایچون گیردی کوپون دالینا،
چکدی الین بیغینا، ساققالینا.
قورد کیمی یاتدی، ماراق ائیله دی،
هر طرفه باخدی، سوراق ائیله دی.
اولدی قضادان بو قضیه عیان،
چیخدی کوپون اوستونه تا بیر سیچان.
سالدی باشین، خمدن ایچدی شراب
مست اولوبان ائتدی عتاب و خطاب،
سؤیله‌دی کیم، هانی او ملعون پیشیک،
چکدی سیچان توتماغا دایم کئشیک؟
بیرجه نولایدی گله میدانیما،
تا کی دوشیدی گؤزو جولانیما!
گرز گران ایله ازیدیم باشین،
تا آخیدا قانلی گؤزوندن یاشین.
جنگ گونی رستم داستان منم،
قوت ایله سام و نرایمان منم.
پور پشنگ ایله کی چنگ ائیلرم،
عرصۀ جنگی اونا تنگ ائیلرم.
شستیمه تاب ائیله مز افراسیاب،
کیمدی پیشیک کی اولا ایتجه حساب؟!
هر نه کی هدیان دانشیردی سیچان
جمله سینی بیلدی پیشیک بیگمان.
تیز ائله‌دی شست ایله دندانینی،
سیچراییبان توتدی گریبانینی،
قایناغینا وردو او بد اختری،
حنجرینه قویدو اونون خنجری.
آغلادی، یالواردی او دمده سیچان،
عرض ائله دی، کئی شه ملک جاهان
هر نه دئدیم عفو ائله کی، مست ایدیم
بیر پوخدی ایدی، آغزیما گلدی یئدیم.
شاه جاهانسان، سنه من نوکرم
بندۀ خارم، سنه خدمتکرم
بیرده گؤرونسه بو صفت بیر ادا
عذر یوخون دور، منه ائیله جزا.
رسمدی کیم، ائیله سه بیر غول خطا،
عفو خطاسین ائدر آخر آغا.
دئدی پیشیک:– وئرمه منیم دالیما
چونکی بلدسن منیم احوالیما
چنگلیمه ایندی گرفتارسن،
تا کی ائدیرسن بئله رفتار سن.
رحم ائله‌ییب گر قویام الدن سنی!
سن گئدیبن دالدا سؤیرسن منی
اوندا دئیرلر هامی احمق منه،
عقل وئریب، فهم وئریب حق منه.
دوشموش اله سن کیمی زیبا شکار
بخت کمک اولدی منه آشکار.
کبک ندیر، یا ندی جیران اتی؟
یوخدو سیچان تک اولارین لذتی.
ایندی سنی ائیلیرم پاره من،
دفعوه ساز ائیله‌میشم چاره من
اول سیچانا چنگینی وردو پیشیک،
ائیله‌دی اندامینی دلمه دئشیک.