منو
سلطان اوف هادی یه
سلطان اوف هادی یه
ای بیزی مدح قیلان هادیی دوران اخوی!
بو نه زحمت دیر، ایا منبع عرفان اخوی!
سیّدی ائیله میسن مدح فراوان، اخوی،
شاد سندن اولاجاق دیر شه مردان، اخوی!
چکدی اول گون کی، حسین کربوبلایه لشکر،
قالدی اول عرصه ده تنها او شه تشنه جگر،
سن اگر اولسا ایدین اوردا، ایا پاک سیر
جانین ائیلر ایدین اول شهه قربان، اخوی!
چاتماییب چون الین اول فیضه، ایا خوش طینت،
ایندی اولادینا بسدیر کی، ائدیرسن حرمت،
جدیمیز شاد اولاجاق اولسا سیزین تک امّت،
مرحبا، نامخدا، صاحب ایمان اخوی!
منی عفو ائیله کی، اؤز جورمومه اقرار ائتدیم،
آنلادیم سهویمی، اقراریمی انکار ائتدیم،
سنه باش چاپما دئدیم، توبه استغفار ائتدیم.
کئچ بو تقصیردن، ای منبع احسان اخوی!
اولاسان عشقده دیوانه، محبتدن دیر.
چاپاسان باشینی مردانه، محبتدن دیر،
تؤکه سن قانینی میدانه، محبتدن دیر،
اولموشام ائیله دیگیم ذمّه پشیمان، اخوی!
لیک گل ایندی بیز ایری اوتوراق، دوز دانیشاق،
ائله بیل کوسلو ایدیک، گل تزه دن بیر باریشاق،
شرع ده وار ایسه باش چاپماق بیزده قاریشاق،
بیر گؤرک وارمی بونا حجت و برهان، اخوی؟
بئله فتوانی گؤرک وئردی بیزه هانسی امام؟
یا کی، اونلار اؤزو ده ائتدی بو امره اقدام؟
بدنین زحمتی گر شرع ده اولمازسا حرام،
بیزده باشلار چاپیبان جاری ائدک قان، اخوی!
گرک اوّل چاپا، باشلارینی فوج علما،
چونکی اونلاردی بو ایشلرده رسول فقرا،
سونرادان باش چاپالار خان، امیرالامرا،
نه کی هر بی سر و پا، لوطی میدان، اخوی!
هئچ ائشیتدینمی چاپیب باشین امام جعفر؟
یا کی موسی رضا، عسکری خسته جگر،
بیزدن اونلار مگر اؤز جددینی آز ایسترلر؟
نیه بس وئرمه‌دی لر بو ایشه فرمان، اخوی؟
بو یقینیم دیر اگر اولسا اؤزو زنده امام،
حکم ائدر: چاپما باشین، نهی دی بو فعل حرام.
یئنه هر ایل چاپاجاق باشینی بو قوم عوام،
دئمه کیم، ترک طبیعت اولا آسان، اخوی!
قودیال اهلی بو ایشه راغیب اولور بیزدن چوخ،
باش چاپیب، قفل تاخیب، جسمه کئچیردرلر اوخ.
نه مذمت ائله ییم، اونلارا بیر تهمت یوخ؛
گؤز آچیب بؤیله گؤروب، عادت ائدیب جان، اخوی!
دوغرودور، باش چاپیریق بیز داخی جمعیت ایله،
بونو لازیم دیرحلال ائیله‌مه یه حجت ایله،
نه اولور بیر گؤز آچیب باخماق ایشه عبرت ایله،
بلکه یول دان چیخاریب دیر بیزی شیطان، اخوی!
ای حسن بئی کی، گلیب لبیمه مردانه بو سؤز،
بیلیرم کی، دیه جک هادی کاپتانا بو سؤز،
چاپ قیل، تا داغیلا صفحۀ دورانه بو سؤز،
قوی منی هجو ائله سین حضرت کاپتان، اخوی!
ای بو نادانلار الیندن یئتیشن جانه حسن،
صبر قیل طعنۀ هر جاهل و نادانه حسن،
حسن، سن ده سیّد کیمی وئر پند حکیمانه، حسن،
بلکه بیر سؤز قانا بو زمرۀ نادان، اخوی!