منو
عابد افندی نین هجوینده
عابد افندی نین هجوینده
ایها الناس، بیلین، تورفه روایت دیر بو،
نه ریا دیر بو، نه بهتان، نه زرافت دیر بو،
دئمه شاعر سؤزودور، نظم عبارت دیر بو،
یا کی الفاظ بلاغت و فصاحت دیر بو،
شهرده واقع اولان اصلی حکایه دیر بو.
دئمه کیم، منکر شیخم، ائشیدیب احوالی،
من اؤزوم یاخشی مریدم، سؤزومه اول حالی،
اولیادن بو فنا منزلی اولماز خالی،
یوخسا هر تولکو صفت کیم، اوزادا ساقّالی،
دئمک اولماز کی، اونا اهل کرامت دیر بو.
بوندان اقدم دخی چوخ شیخ گلیب دنیایه،
لطف دن فیض وئریب لر ملع اعلایه،
او حاجی احمد افندی کی، کؤچوب عقبایه،
اؤزونو سالمادی او جیفه اوچون دنیایه،
تاری رحمت ائله سین، واصل رحمت دیر بو.
وار اونا ائیله مریدلر کی، اونو شاه بیلیر،
بعضی لر نحس اوزون مهر سانیر، ماه بیلیر،
بعضی لر درگهینی حقه گئدن راه بیلیر،
بعضی ده وار کی، شیخین اؤزون الله بیلیر،
قسم اول خالقه کیم، عینی ذلالت دیر بو.
بیرجه گؤر عابدین احوالینی، ای صاحب حال،
گؤزو هر عورته دوشسه کی، اولور آنه حلال،
باخ، بو ملعون اؤزونو گؤر کیمه ائیلر تمثال!
قیلدی آخر بو لعین شرع رسولو پامال،
یئنه دئرلر کی، اونا اهل شریعت دیر بو.
نئجه کی، شاهد احوالدی بو امره بو کار،
گوش وئر، تا کی قیلیم من سنه آنی اظهار،
ائشیدیب تا قیلاسان عابده لعنت بسیار.
گرچی تفصیلن ائدیم شرحین، اولورسان بازار.
مختصر شعریمه شرح اولدو، کفایت دیر بو.
شیعه مذهب لری رسوا ائله‌میشدی بابی،
سنّی دن هم داخی بیر شیخ چیخیب قلابی،
جمع ائدیب باشینا هر بی سر و پا کذابی،
دیشی ائرکک قاریشیب رقصه، چالاللار قابی،
بیرجه باخ دقت ایله، گؤر کی، نه عادت دیر بو!
بلکه دیلده بیر افندی وار ایدی پیرانه،
هر کرامت ائله‌میشدی اونا بیر دوردانه،
اودا وئرمیشدی اونو بیر اوزو گول اوغلانه،
وه نه اوغلان کی، اوزو گولدو، گؤزو مستانه،
قامتین گؤر، دئمه کیم، سرو قیامت دیر بو.
ظاهراَ عاشیق ایمیش عابد هم اول سیمبره،
ائشیدیب تا کی آتاسی کی، اونو وئردی اره،
مینیبن آتینی بد ذات قویوب اوز شهره،
ائیله‌ییب عرض کی، سالسین ایشینی بیر تهره
کی، ناچالنیک، سنه قربان، نه عدالت دیر بو؟
آلیب آروادیمی زورایله الیمدن آغا بگ،
وئریب اؤز نوکرینه، حرمتیمی ائیله‌دی حک.
منه بوندان سونرا بس واجب اولوبدور اؤلمک؟
سنّی مذهب، من بیچاره یه سن ائیله کمک،
دئمه شیخم منی، قاپیندا بیر امّت دیر بو.
بو سؤزو تا کی ناچالنیک ائشیدیب قیلدی غضب،
یازیلیب حکم، قیلیب هامینی دیوانه طلب،
شهره تا وارد اولوب آغا بئی عالی نصب،
عابدین کذبی بوروز اولماغینا اولدو سبب،
بیلدی لر جمله خلایق کی، نه علت دیر بو.
منه تحریک وئریردی بو ایشه بیر نئچه کس،
من ده تا کی طمع خامه دوشوب ائتدیم هوس،
یا باغیشلا منی سن، یا باشیمی ترسینه کس،
قویما، قربانین اولوم، خلقه یاییلسین کی، بو سس،
بیلمیشم قلپیمی کیم، عینی حماقت دیر بو