منو
همایینی هجو
همایینی هجو
ای همایی، بو نه اطواردی اظهار ائله دین،
چرخ بدمهر کیمی ظلمو پدیدار ائله دین،
صبح کاذب کیمی صادق یوزونو تار ائتدین،
صادقین ثابت اشکین یوزه سیّار ائله دین،
شفق اشک ایله رخسارینی گولنار ائله دین؟
دوستلوقدا نه اوچون گوزله مه‌دین اندازه،
دشمن اولدون نیه اول سرو قد و طنازه،
قلعۀ شیشه یه سالدین گئدیبن آوازه
کی، فلانی رخ زیبایه اوراردی غازه،
شاهد قسمته مشاطه لیک اظهار ائله دین.
صادقین نامه سی گلدی منه، ای طالب راز،
سانکی یازمشدی اونو ناز ایله محموده ایاز،
لیک باشدان آیاغا شکوه ایدی، سوز و گداز،
گؤرونور عشق حقیقین دئمیسن عشق مجاز،
ای برادر، نه اوچون سن بئله رفتار ائله دین؟
صادقین وصفینی داستانه گتیردین سن اؤزون،
گئدیبن کشور شیروانه گتیردین سن اؤزون،
تحفه تک بزم سلیمانه گتیردین سون اؤزون،
میندیریب رخشینی میدانه گتیردین سون اؤزون،
وصفینی عالمه فردوس کیمی جار ائله دین.
ای عزیزیم، گلیبن شورایله گفتاره اؤزون،
ائیله دین خلقی زلیخا رخ دلداره اؤزون،
چکدین اول یوسف گولچهره نی بازاره اؤزون،
ائیله دین عرض متاع ینی خریداره اؤزون،
سونرا دؤندون نیه بس طلق خریدار ائله دین؟
ای همایی، قسم اول پادشه قهاره
کی، وئریب دیر قولاغا سمع، گؤزه نظاره،
حسنده یوسف اولا گر او مه سیّاره،
اولماییب پیرهن عصمتی هرگز پاره،
یوخ یئره سن بو ایشی بیر غرضین وار ائله دین.
خود توتاق صادقه لازیم گؤرونوردو بهتان،
نئیلمیشدی سنه محمود آغا، ای روح روان؟
شرم ائدیب گؤزله مه‌دین حق نمک، حرمت نان،
گئدیبن قله یه حقینده دانیشدین هدیان،
فی الحقیقه، نه اونو، سن اؤزوی خوار ائله دین.
آغانین نعمت الوانی گؤزوندن گلسین!
سفرۀ بزم سلیمانی گؤزوندن گلسین!
کابابی، چاخری، بریانی گؤزوندن گلسین!
مئیی اولسون جگرین قانی، گؤزوندن گلسین!
چونکی حقینده اولان فیضینی انکار ائله دین.
گلمیسن بیر نئچه دفعه سن اؤزون شیروانه،
حسنده بنزر ایدین مهر و مه تابانه،
سنه ده محمود آغا ائتدی خیانت، یا نه؟
نیه بیجا یئره سالدین کیشینی بهتانه؟
بینوانین نه اوچون فسقینی اقرار ائله دین؟
نغمات اهلینه محمود آغانین رغبتی وار،
بیلمه ین یوخدو، بو اسراره اونون شهرتی وار،
گر اولا، حقی ده واردیر، کیشی نین دولتی وار،
دولتی، مرفعتی، لذتی وار، حرمتی وار.
سن بو ظاهر ایشی باعث ندیر انکار ائله دین؟ [...]