وداع امام حسین(ع) -(بند بندیمدن منی گر دوغراسا دشمن باجی)

بند بندیمندن منی گر دوغراسا دشمن باجی

دست بیعت وئرمه‌رم اصلآ یزیده من باجی

 

هر کشاکش وار باجی بیر کلمه‌ی بیعتده دور

بو کشاکشدن ولی بعضی لری حیرتده دور 

حفظ ناموس و شرافت، حفظ حیثیتده دور

گئچمه‌رم حیثیتیمدن اول گيلَن ایمن باجی 

 

آب خضر اولسا دنی اشخاص الیندن ایچمه‌رم 

باش اگوب ادنایه عالی منصبیمدن گیچمه‌رم 

سینه‌می دولدورسا اوخ بیر دسته گلدن سئچمه‌رم

زخم خنجردن خوشام جسمیم اولا گلشن باجی

 

اوز مقدس فکریمه لازیمدی جان شاباش وئرم

رونق دین مبین اوسته اوغول قارداش وئرم

چوخ سعادتدور دم شمشیر شمره باش وئرم

فکریمه کون و مکان اهلی دئسون احسن باجی

 

امر دینی دور بو مطلب، جنگ شخصیت دئگیل

منده گر شور شهادت وار، علت‌سیز دئگیل

لفظ ننگ آوردی بیعت، اؤلماقیم ذلت دئگیل

عزت دین اوسته اؤلّم من، اسیر اول سن باجی

 

بیر نمایش وئررم ای باجی صباح بو چولده من

مستقیمُ الرَّأی‌لیقدا آدیمی قیلّام علن

قامت رعناسینه اوز اوغلومون سالّام کفن

جسمینی اوراق ائدر قرآن کیمی دشمن باجی 

 

بو بیاباندا پوزار شام اهلی تشکیلاتیمی 

داش وورالّار قان دوتار بو حق نما مرآتیمی 

نیزه‌ده وئرّم نشان هر یئرده معلوماتیمی 

تا اولا هر یئرده رسوا شمر ذی الجوشن باجی 

 

اصغریم اوخلانماسا تکمیله یئتمز نیتیم

اولماز اهل باطله معلوم حقانیتیم 

کشف اولار اصغر باشیله عین مظلومیتیم 

گون کیمی مطلب اولار عالم‌لره روشن باجی 

 

تک به تک وئرّم بو چولده باجی یئتمیش بیر فدا

عالم معناده فخر ائیلر منایه کربلا 

اکبرین نعشین گؤرنده لیلیِ مجنون‌نما

چوللری وار حقی ائتسون قیس تک مسکن باجی 

 

قیزلاریم سوز عطشدن بیر ساری گول تک سولار 

قارداشیم عباس علی اولادینه سقا اولار 

اوخلانار سو مشگی، مشگِ چشمی قان‌ایله دولار

اللریندن ال چکر عباس شیر اوژن باجی

 

حفظ حیثیتده‌دور (سعدی) شرافت لاکلام 

تیغ‌ایله حق اوسته جان وئرماق شرافتدور مدام 

بو سوزیله عزت نفسین وئروب مشقین امام 

اؤلّم اما ائتمرم بیعت یزیده من باجی