شهادت امام حسن عسکری(ع) -(گؤزومده غم گتیرور موجه اشک دریاسین)

گؤزومده غم گتیرور موجه اشک دریاسین

دییه‌ن زمان حسن عسکری قضایاسین

 

اولئیدی کاش بو معموره روزگار خراب

ائدنده معتمد دون جفایه فتح الباب

 

ائدوب امام زمانین آتاسینی مسموم

او زهریله حسن عسکری اولوب بی‌تاب

 

موثر اولدی ز بسکه امامه زهر جفا

دوتوبدی رعشه وجود شریفی چون سیماب

 

گئچنده سال قمردن ایکی یوز آتمیش ایل

اولوبدی جدینه ملحق وصی ختم مآب

 

ربیع الاول آیی، روز جمعه، هشتم ماه

بو شاه دینون اولوبدی منامی تیره تراب

 

بئله روایت ائدور اول شهین غلامی عقید

کی مندن ایستدی سو اول سلاله الاطیاب

 

حضورینه او شهین آب مصطکی گتدیم

ولیک رعشه امان وئرمیوب اولا سیراب

 

قویوب یئره دئدی سو وئر ائدوم وضو تجدید

امام عصر الده گتوردی کاسه آب

 

زمان صبحیدی ائتدی وضوسینی تجدید

نماز صبحی ادا ائتدی پور ام کتاب

 

دوباره آلدی اله آب مصطکی ایچسون

یئتوردی لبلرینه خسرو سپهر غباب

 

ائدوبدی رعشه الی، دگدی کاسه دیشلرینه

صعوبتیله ایچوب سو شفیع یوم حساب

 

عطش حرارتینی سوندوروب تمام اولدی

بو شرح غم گینه الدن آپاردی طاقت و تاب

 

حسینه اولمادی بیر کیمسه بیر ایچیم سو وئره

دییه یارالیدی، قلبین عطش ائدوبدی کباب

 

بئله روایت ائدور بو سوزی ابوالادیان

اونون دلینجه ائدوب ثبت معتبر کتاب

 

دییر امام حسن یعنی اون بیریمجی امام

منی حضوره چاقوردی بو نوعی ائتدی خطاب

 

واریمدی بیر نچه نامه آپار مداینه سن

اوتوز گونون اولی نصفی سنه ایاب و ذهاب

 

گلنده شهره گوررسن قیامت عالمی‌دور

ائدوبدی چاک گریبان تمام شیخ‌ایله شاب

 

دولوب فغان و نوائیله شهر سامرا

او دمده داعی حقی بول ائتموشم ایجاب

 

دئدیم آتام سنه قربان خدا نکرده اگر

بو ایش اولا، سنه کیمدی وصی، وئردی جواب

 

او کس که ایستیه سندن جواب نامه لری

امام مفترض الطاعه دور او عرش جناب

 

دئدیم بیر آیری علامت بویور، دئدی هر کیم

قیلا نمازیمی بولسون امام اونی احباب

 

دئدیم بیر اوزگه علامت، دئدی کی همیاندا

وئره او کس که مطلائیله طلایه نصاب

 

خیال ائتدیم ائدم عرش هانسی بیر همیان

دوتوب وجودیمی رعب امام و بیم عتاب

 

مرخص اولدوم امام هدی حضوریندن

گئدوب مداینه قیلدیم مراجعتده شتاب

 

منیم مسافرتیم جمله چکدی اون بش گون

یئتنده شهره نه گوردوم جهان اولدی خراب

 

فغان و شیونیله سر من رآی دولودور

ملال بحریدی، مردم او بحر ایچینده حباب

 

امام رحلت ائدوب صحنیده وئرولر غسل

انا الامام دئیور خلقه جعفر کذاب

 

دئدیم من اوز اوزیمه بو امام هاردان اولور

و حال آنکه قمار بازیدی ایچردی شراب

 

عقید گلدی دئدی ائتدیلر امامه کفن

نماز قیل دوزولوبدور صفه تمام اصحاب

 

نمازه جعفر کذاب ائیلیینده شروع

حقیقتین گونی یوزدن کناره چکدی سحاب

 

طلوع ائیلدی دولت سرای والادن

صغیر سنیله بیر آفتاب عالمتاب

 

جبین گشاده و دندان گشاده، گندمگون

جمالی گون کیمی طالعدی، زلفی پرخم و تاب

 

گلوب وقاریله دوتدی عباسینون اتگین

بویوردی جعفره یاعم ائتمه بئیله شتاب

 

آتام نمازینی قیلماقلیقا من اولایم

چکیل کناره، او بی شرم او طفله اولدی مجاب

 

نمازی قیلدی همان سید جلیل القدر

امامی قبره قویوب قلب پاکی اولدی مصاب

 

دونوب بویوردی منه وئرجواب نامه لری

او طفله رد ائله‌دیم، غائب اولدی اول مهتاب

 

دئدیم من اوز اوزیمه بو ایکی علامتیدی

منه گئدنده بویورموشدی شاه ذوالانساب

 

او گیر و داریده بیر دسته اهل قم گلدی

امام موتینی بولدی او باوفا احباب

 

سوال ائتدیله کیمدور وصی، دئدی حضار

امام قارداشی جعفر اولوب امام صواب

 

گلوبله جعفر کذابه تهنیت دئدیلر

سواله ائتدیله بو دللریله فتح الباب

 

بویور گوراخ سنه کیمدن گتیرمیشوخ نامه

نئچه وئروبله بیزه ایله امری کشف حجاب

 

دوروبدی جعفر ایاقه تغیریله دئدی

مگر امام بولر غیبی یا اولوالالباب؟

 

غلام حضرت حجت چیخوب او ساعتده

ائدوب امام زمان قولی‌‌جه او جمعه خطاب

 

وئروبدی نامه‌لری سیزلره فلان و فلان

منه آچوبدی خدا علم غیبیدن ابواب

 

امام مالیدی، واردور یانوزدا بیر همیان

مین اشرفی وار ایچینده به سان در خوشاب

 

ولی او کیسه‌ده اون اشرفی مطلادور

خیال ائدوبدیله من بولمه‌رم چکوبله نقاب

 

او جمع سؤیلدی هر کیم کی گوندروبدی سنی

اودور امام زمان بیزلره ملیک رقاب

 

گئدوب خلیفیه جعفر بو وضعی وئردی خبر

ائدوب خلیفه نی بو ماجرائیله اعتاب

 

خلیفه امر ائیلدی حجت اللهی دوتالار

او دودمانه هجوم آور اولدی اهل عذاب

 

ایکی امام اؤلن گون توکولدیلر ایوینه

حیالی عترتی توکدی عذارینه خوناب

 

بیری امام زمان صاحب الزمان آتاسی

بیری حسین او کی قانیله شیبی اولدی خضاب

 

چکیلدی جار حسین اؤلدی وقت غارتدور

تؤکولدی خیمه‌لر اوسته سپاه کینه مآب

 

سویولدی زینب کبری باخوب او حاله یانوب

صفیه عاتکه لیلا سکینه نازلی رباب

 

نه غارت، ائتدی قیامت قیام زهرایه

مخدراته بویون باقی اولدی قید و طناب

 

وورولدی سید سجاد بوینونا زنجیر

گؤزیندن اولدی روانه سرشکی چون میراب

 

او توزلی قبره حسینی اولوبدی چوخ مشتاق

دوزت وسایلینی یا مسبب الاسباب