زبانحال حضرت زینب(س) در قتلگاه -(عریان گؤرنده قارداشینی دخت بوتراب)

عریان گورنده قارداشینی دخت بوتراب

یوز توتدی آفتابه طرف ائیله‌دی خطاب

 

ای گون نه‌دور بو سوزشون اودلاندی قارداشیم

رحم ائیله گورموسن مگر عریاندی قارداشیم؟

 

بیر آز شرارِ قوّه‌ی ناریّه‌وی آزالت

آرتورما اوز حرارتیوی یاندی قارداشیم

 

بی‌غسل و بی‌کفن قالوب عریان جنازه‌سی

یوخ بیر نفر دئسون کی مسلماندی قارداشیم

 

شیرازه‌دن چیخوب داغیلوبدور ورق ورق

پامال اولان صحایف فرقاندی قارداشیم

 

وار گورموسن عوالم امکاندا انقلاب؟

قطب مدار عالم امکاندی قارداشیم

 

ایمانی اولمیانلار ائدور ادعای دین

بیلموللر اصل جوهر ایماندی قارداشیم

 

قرآن کتابمیزدی دییه‌نلر کسوب باشین

روح کتاب و معنی قرآندی قارداشیم

 

گیزلت اوزون، جمالیوه سال ابریدن حجاب

قانلی شفقده مهر درخشاندی قارداشیم

 

وار کافر اولسا شرعیده مهمانه احترام

بیر کس ترحم ائتمه‌دی مهماندی قارداشیم

 

اولدی مباح سو بو قوناقدان مضایقه

یاندی سوسوزدان، اود دوتوب اودلاندی قارداشیم

 

قانلی گؤزی فراته باخور نوک نیزه‌دن

معلوم اولان کی ایندیده عطشاندی قارداشیم

 

نه باشی وار بدنده، بیلکده نه اللری

توپراقلار اوسته قانینه غلطاندی قارداشیم

 

آت دیرناقی ایله داغیدوب، ییغماق اولموری

اعضاسینی، کی خاکیله یکساندی قارداشیم

 

قانین حلال فرض ائیلیوب هر گلن ووروب

بیر پارچا شیشه‌دن توکولن قاندی قارداشیم

 

اوخلار اوخ اوستونه وورولوب، جیسمی گزله‌نوب

یوخ اوخلارین چکن، دولی پیکاندی قارداشیم

 

گودال قتلگاهی ائله دولدوروبدی داش

گؤرسنموری جنازه‌سی پنهاندی قارداشیم

 

جسمین قویوبلا قسمته قربان تک اهل شام

جَدّی قویان شریعته قرباندی قارداشیم

 

آل امیّه ائیله‌مسون دینی ملعبه

عالمده مُلک دینه نگهباندی قارداشیم

 

هر بی شرف که بیر یارا ووردی وجودینه

جانان یولوندا عین شرف ساندی قارداشیم

 

بیر دسته آتشی گوله بنزر یارالاری

سویلر گورن صفالی گلستاندی قارداشیم

 

آللهی، دینی، مذهبی انکار ائدنلره

دنیا بویی مبلّغ یزداندی قارداشیم

 

قارداشمین آدیله مجالس اولار بینا

احکام دین دئییلماقا عنواندی قارداشیم

 

معلوم اولان یانورسان اودور وار حرارتین

آغلا سو سپ جنازه سینه، یاندی قارداشیم

 

خاک شفادی تربتی درد (حسینیه)

هر درد بیدوا اولا درماندی قارداشیم