وجهینده پئیدادیر سنین انوار-ذات-کیبریا
وجهینده پئیدادیر سنین انوار-ذات-کیبریا،
اول یۆزه قارشو دخی شرمندهدیر شمسالضحا.
لئیلی جمالیندان جۆدا مجنون کیمی سرگشتهیم،
فرهادوار ایستر کؤنول شیرین دوداغیندان شفا.
جام-مۆصفّادان مانا ساقی ایچیردی بیر قدح،
صوفی نه بیلسین من نئجه اول جامدن بولدوم صفا.
هر کیم کی، تؤوحید اهلیدیر، اول دید و وادید اهلیدیر.
روز-ازلدن تا ادب ایستر کمال-مۆنتها.
من جاهیل و نادان ایدیم، اول حۆسن اۆچون حئیران ایدیم،
تا گنج ایکن پۆنهان ایدیم، شیمدی گؤزومدن ظاهیرا.
عینالیقین حق سیرّینه ایدراک ائدن اینسان ایدیم،
ائی معریفتدن بیخبر، اینصافه گلگیل (بیدغا).
جان و جهانی سیزسیزین نئیلر خطایی خسته دیل،
سندن مۆدام احسان دیلر، چۆنکی گدادیر بینوا.