بیر کومادا بالاسینا لایلا چالیر بیر آنا،
دردلرینی سانکی بیر-بیر یادا سالیر بیر آنا.
بو لایلادا ساکیت آخان بولاقلارین سسی وار،
باهار چاغی پؽچیلداشان یارپاقلارین سسی وار.
بو لایلانی اوزاقدان
اۆرگیمین قولاغییلا ائشیدیرم بایاقدان.
بیر ایگیدین بالاسیدیر بو کؤرپه،
بیر شهیدین بالاسیدیر بو کؤرپه.
یاخشی فیکیر وئریرم،
من تانیشام بو لایلانین هر سؤزویله
تبریزدهکی او داخمادا بئشیگی ده گؤرورم،
قانا دؤنموش اۆرگیمین گؤزویله.
بو لایلانین هر سسینده
سانیرام کی، منه دوغما بیر ماهنینین سطری وار.
بو لایلانین نفسینده
تارلالارین، مئشهلرین، چمنلرین عطری وار.
احتیاج یوخ سوالا،
اینانین کی، بو لایلا
ایگیدلرین آدینی،
شهیدلرین آدینی
گیزلینه
کؤرپهجیگین قولاغینا پؽچیلداییر هر گئجه.
بو لایلادا بیر خالقین، بیر وطنین
قؤور ائلهین یارالاری گؤینهییر.
چیچگینه قان چیلنمیش چمنین
بۆلبوللری غم یئییر.
مۆرگولهین کؤرپهنین گۆلومسهییر گؤزلری،
نهسه دئییر گؤزلری.
ائشیتسین آنا وطن،
بیلیرم بو سیرّی من:
کؤرپه صاباح اؤز الییله،
خالقین بؤیوک عملییله
قوراجاغی دۆنیاسیندان راضیدیر،
آناسینین لایلاسیندان راضیدیر!