من تبریزلی آنالارا بلدم،
فخریمدیر بو عزیز، قوچاق آنالار.
کؤرپهسینین بئشیگینین باشیندا،
صبحه قدر قالار اویاق آنالار.
محبّتی چیچکلنر ایلک گۆندن،
ذرّه بئزمز اؤز آنالیق یۆکوندن.
بالاسینا نامردلیگی کؤکوندن
صاف سۆدویله ائدر یاساق، آنالار.
هر کلمهسی، هر سؤزو گۆل قوخویار،
لایلاسینی دیلکلردن توخویار.
اۆرکلردن کئچنلری اوخویار
کیتاب کیمی واراق-واراق، آنالار.
خاطا چؽخسا اؤولادینین الیندن.
اینسانلارا زیان دَیسه دیلیندن،
اۆز دؤندرسه وطنیندن، ائلیندن
کاندارینا باسماز آیاق، آنالار.
تا ازلدن دار گۆنونده ائللرین،
قارشیسینا سینه گرر سئللرین.
نفسینی کسر قارا یئللرین،
دایاقلارا اولار دایاق، آنالار.
قان آخارکن تبریزده سو یئرینه،
دؤیوشلرده اۆرک وئرر ارینه.
ناله چکیب، شهیدلرین قبرینه
گۆللر سپر قوجاق-قوجاق، آنالار!