منو
قاسیم بیگ ذاکیر
قاسم بیگ ذاکر (۱۷۸۴-۱۸۵۷م) ۱۹-جو عصرین ان بؤیوک ساتیریک شاعیریدیر. او قاراباغ خانلیغی‌نین اساسینی قویان پناه‌خان نسلیندندیر. چار حاکیملرینه و یئرلی بیگلر ایله آپاردیغی موباریزه نتیجه‌سینده حؤکومت طرفیندن باکی‌یا سورگون ائدیلمیشدی. اوغلو نجف‌قلی‌بیگ و قارداشی اوغلو اسکندر بیگ ده روسیه‌نین ایچریلرینه سورولدولر. شاعر دوستو میرزا فتحعلی آخوندوف-ا یازدیغی منظوم بیر مکتوبدا وطنیندن دربه‌در اولدوغونو آجی شکایتلریله بیلدیرمیشدی.
ذاكیر حیاتینین چوخ حیصه‌سینی مهدی‌قلی‌خانین اونا باغیشلادیغی خنزرستان کندینده کئچیرمیش و کندلیلرله برابر یاشامیشدیر. شعرلرینده کی خلق معیشتی‌نین تصویری و خلقچیلیگی شاعیرین بو حیاتیله علاقه‌داردیر. ذاکیر شعره واقف-ین تأثیری ایله باشلامیش و رئالیست شعر اوسلوبونو داوام ائتدیرمیش و بو یولدا چوخ یوکسلمیشدیر. شاعیرین قوشمالاری ان پارلاق شعرلریدیر. شعرلرینده خلق احوال روحیه‌سی، محلی و میلّی خوصوصیتلری و عادتلری تصویر ائدیلمیشدیر. ذاکیرین کلاسیک شعر اوسلوبوندا یازدیغی موخمس، موستزاد، ترجیع‌بند و ترکیب‌بندلری، غزللری و سایر منظوم پارچالاری دا واردیر. بونلارین بعضیلری ختائی، فضولی، نشاط، آقامسیح شیروانی، ودادی و واقف-ه نظیره اولاراق یازیلمیشدیر. منظوم حکایه‌لریندن «زوج اخیر» آدلی اثری چوخ ماراقلیدیر. بو اثرده شرق قادینلاری‌نین فئودال دونیاسیندا اَیلنجه اولدوغونو و حوقوقسوز بیر حالدا یاشادیغینی تصویر ائتمیشدیر.