علاج اولدو هر بیماره

کئچدی نوبت زمستان،
یئنه فصل باهار اولدو،
عندلیب بینوانین،
صنعتی آه و زار اولدو.

یاسمن و گول و لاله،
بیر چمنده غروب حاله،
ارغوان توتوب پیاله،
نرگیس ایچیب خمار اولدو.

امر اولوندو، آب نئیسان،
جان سیزلارا بخش ائتدی جان؛
یئنه تزه لندی دوران،
نه گؤزل روزگار اولدو!

سبزپوش اولوب چمن لر،
قالدیردی هر شکوفه سر،
اویان، ای بخت بی خبر،
یاتان هامی بیدار اولدو.

علاج اولدو هر بیماره،
تاپیلدی دردینه چاره.
ائله حسرت قالان یاره،
ذاکیر دلفکار اولدو.