اوزون جانا مه تابانا بنزر
اوزون جانا مَهِ تابانا بنزر،
او زُلفون دستهی ریحانا بنزر.
دوشوبدو صفحهی رویوندا خالین،
کی گویا نقطهی قرآنا بنزر .
ایکی قاشین منیم قتلیمدن اؤترو،
چکلیمیش خنجر برّانا بنزر.
سنین بو نوک مژگانین ستمله،
عجب خونریزدیر، پیکانا بنزر.
دهانین تنگ شکّردیر ولیکن،
دوداغین غنچهی خندانا بنزر.
منی قویما سکندر تک سن حیران،
لعابین چشمهی حیوانا بنزر.
اگر آیری دوشم گول عارضیندن،
سرشک چشمیم اول عمّانا بنزر.
اگر سنسیز گئدم خلد برینه،
یقین ائیله جنان نیرانا بنزر.
بو غمزین لشکری ائتمیش مسخّر،
کؤنول شهرین، ولی سلطانا بنزر.
من دیوانهیه زنجیر اولوبدور،
خم زُلفون، عجب چوگانا بنزر.
کباب اولدوم سنین عشقینده جانا،
که عشقین آتش سوزانا بنزر.
گرامی دوتگیلن بو مضطری سن،
فنا دنیادا بیر مهمانا بنزر.