جانا! لبیندی چشمهی حیوان مقابلی
جانا! لبیندی چشمهی حیوان مقابلی،
مه طلعتیندی مهر درخشان مقابلی.
جانا سپهر حُسنده مه ائیلهییب خسوف،
زُلف سیاه اولوب مه تابان مقابلی.
زُلفون دوشنده عارضینه اغتشاش اولور،
وجهی نهدیر کی کفر اولوب ایمان مقابلی؟
همتا سنه بو حُسنده یوخدور جهانآرا،
حُسنوندو حسن یوسف کنعان مقابلی.
لعلین صفا و خالین حجر، زمزمین زنخ،
رخساریوین طوافی یوز احسان مقابلی.
نشو نما چمنده داخی سرو ائیلهمز،
اولسا اگر بو سرو خرامان مقابلی.
مژگان خدنگینی دوتوب الده کمان قاشین،
جاندیر هدف او ناوک مژگان مقابلی.
هجرین جهنمی ولی وصلیندی عاشقه،
باغ بهشت، حوری و غلمان مقابلی.
نام بهشتی بو دیله هرگز گتیرمرم،
چون عارضیندی روضهی رضوان مقابلی.
اوز قویمیشام بو درگهه مور ضعیف تک،
سن سن بو کشور ایچره سلیمان مقابلی.
زُلفونله پایبند منی قیلمیسان بو گون،
هر یانا گر گئدم اولو زندان مقابلی.
بو اهل عشقی ائتسن اگر بیر ـ بیر امتحان،
اولماز یقین بو مضطر نالان مقابلی.