گؤزلر

او اینجه، نازلی باخیشلار، او آتشین گؤزلر
حزین حزین نه باخیر، سانکه عاشیقین گؤزلر
سنین کیمی، گؤزلیم، نازنین گؤزل چوخدور
کی، یوخدور هئچ بیریسینده، بو نازنین گؤزلر
سنین او گؤزلرینی بیرجه یول گؤرن عاشیق
اینان کی، سؤیله یه جک یوز یول آفرین گؤزلر!
سورولسامندن، اسیر ائیله ین کیم اولدی سنی؟
باخوب بو گؤزلره عرض ائیلرم، همین گؤزلر
وفاسی اولماسا بیر گون ده، چوخ گمان، دوزمز
وفالی اولسا، یوز ایل عاشقین یقین گؤزلر
همیشه شاد اولورام انتظار وصلین ایله
نئجه کی، بیر تازا داماد اولان گلین گؤزلر
من اؤز نیگاریمی، عیب ائتمه، گؤزله سه م، واحد
کی، بولبول اوز گولونو، عاشیق همدمین گؤزلر