منو
گؤتوردو چهرۀ اظهاردن نقاب خفا
هوا عرایس گلزاره اولدی چهره گشا،
باهار، گلشنه گئیدیردی حُلۀ خضرا.
چمن ایالتینه اولدی نصب خسرو گل،
هوایه ابرصفت حکمون ائتمه یه اجرا.
یازیلدی سبزۀ نوخیزدن خط احکام،
چکیلدی سایۀ مطبوع سرودن طوغرا.
صریر آب روان و صفیر مرغ چمن
نکات تهنیۀ مقدم ائتدیلر انشاء.
زبان سوسن آزاد و سبزۀ نوخیز
ثنای رفعت اجلاله اولدیلار گویا.
شقایق آلنی زمین بوسدن اولوب مجروح،
بنوشه قامتی اولدی تواضع ایله دوتا.
مرتب ائیله‌دی بیر بزم گلشن ایچره باهار
کی، وئردی ذوق تاماشاسی نشئۀ صهبا.
عنادل ائتدی بیان مراتب نغمات،
قناری اولدی ترانه کش و سرود سرا.
صدای مرغ بوراخدی بزرگ و کوچکه شوق،
سرود آب ایله عشاقه حاصل اولدی نوا.
بیلیندی غنچه ده گل برگی ظاهر اولماق ایله
کی، غنچه باشینه یاغدیردی ژاله سنگ جفا.
جراحت اولماسا اعضاده ظاهر اولماز قان،
ترشح ائیله مز البته سینمادان مینا.
همای وش ورق یاسمین و برگ سمن
اوچوب هوایه گلستانه دوشدی ظل هما.
باهار تاجری مصر چمن غنی لرینه،
بوراقدی یوسف گل، عرض ائیله‌ییب غوغا.
بو ذوق سالدی زولیخای لاله یه بیر شوق
کی، لعل و مشک تؤکوب، وئردی آغیرینجا بها.
حدیقه تختۀ تعلیم اولوب ریاحیندن،
یازیلدی موهمل و معجم اونا حروف هجا.
مزین ائیله‌دی اوراق لاله یی شبنم،
حروف لاله ده اولماز اگرچی نقطه روا.
گؤتوردو شبنمی، اظهاردن حرارت مهر،
شکوفه نقطه‌لرین گرچی حکم ائدر املا.
دبیر باد وئریب طفل عندلیبه سبق،
گؤتوردو چهرۀ اظهاردن نقاب خفا.
قامی درخت بولوب رفع استقامت حال،
شکوفه حملی ایله کسر بولدولار، الا
نهال بی بدل سرو کیم، قالیب منصوب،
ثبات حال ایله اونلاردان اولدی مستثنی.
صدای سیل چکر مدّ متصل، یعنی
کی، مدّ متصل ایله اولور، قرائت ما.
گؤروندو هیأت آب رواندا شکل حباب،
ثبوته یئتدی ثبات نجوم و سیر سما.
خطوط مختلف و مستقیمی انهارین
چمنده سالدی زوایای گوناگون بینا.
رعایت طرق مستقیمدن، نئجه کیم،
اولور حصول مقامات جنت المأوا.
هوای باغی دن ائتدیم بو حکمتی معلوم
کی، اعتدالده دیر صحت حواس و قوا.
فضای گلشنی ازهارایله گؤروب مملو،
یقینیم اولدی کی، ممکن دئگیل وجوده خلا.
نظرده اولماق ایله صبح وشام، غنچه و گل
بدیهی اولدی کمال اهلینه حصول صفا.
نتیجه سالبه اولماق خلاف عادت دیر،
اولونجا موجب صغرایه متفق کبرا.
ضمیر گلبنه گول رنگی سالدی آتش بیم
کی، حُمره قانه اولور نفس ائوینده راه نما.
گول آتش اوزره قیلیر عقد زهرۀ شبنم،
تدارک قمر و شمس ائدر صباح و مسا.
بو کیمیا سببیندن عجبمی دیر اولسا،
الینده دانۀ ارزن مثابه سینده طلا؟
شکوفه سیمینه فرض ائیله‌دی خروج زکات،
مدار حول و بلوغ نصاب استغنما.
حقوق دفعی ایچون اغنیای اشجاره،
صهایف چمن اولدی ایادی فقرا.
بهاردن تن گلبنده ائیله‌ییب هیجان،
حرارت دَمَوی قیلدی عقده‌لر پیدا.
بویاندی قانی ایله صفحۀ چمن گل گل،
مگر کی، فصدینه حکم ائیله‌میش طبیب هوا.
حبال سحره دؤنوب جنبش جداول آب،
کلیم سرو اونا عکسدن بوراخدی عصا.
اولوب ترنّم بلبل عزایم تسخیر،
چمن پری لرینه لازم اولدی عرض لقا.
بساط گلشنه دون ائیله‌دیم گذر کی، دمی
قیلام نظارۀ آثار قدرت مولا.
عجب نزاعده گؤردوم چمن ظریف لرینی،
تعجب ایله قامی سالک طریق خطا.
قامی گمان ایله مستدعی طریق نجات
ولی، قاموسونا باطل دلیل استدعا.
سالیب شکوفه مبادی صنوفه اشجاری،
قیلیردی بحث کی، جایز تعدد قدما.
وئریب تسلسله قوت طبیعت کج آب،
اولوردو نافی اثبات علت اولی.
خیال محض سانیب کایناتی نرگس مست،
قیلیردی جهل ایله نفی حقایق اشیا.
ائدیردی بلبل کافرنهاد سجدۀ گل،
تعبّد صنم ایله توتوب نجاته رجا.
نسیم واقف اولوب بو فسادی منع ائتدی
کی، ای گروه پریشان، توتون طریق هُدا!
بو کارخانه بیر استاددان دئگیل خالی،
گرک بو قدرته، البته، قادر و دانا.
قیلیر دلالت علت وجود هر موجود
ولی، نه سود کی، صاحب نظر دئیل اعما.
مکوناته حودوث اول قدیمدن دیر کیم،
کمال ذاتینه ممکن دئگیل قبول فنا.
قدیر و مقتدیر و قادر و مقدر و حیّ،
علیم و عالم و علام و اعلم و اعلا.
زهی تکوّن کامل کی، قدرتیندن دیر،
پری لقالره لطف تناسب اعضا.
ملاحت لب میگون و لهجۀ شیرین،
نزاکت قد موزون و چهرۀ زیبا؛
صفای جسم لطیف و قبول جوهر پاک،
لطافتی خط مشکین و زلف عنبرسا.
کمال قدرت علمینه دیر شواهد عدل،
عقود سلسلۀ کارخانۀ دنیا.
بساعط شرف محرمیت وحدت،
مرکباته قبول ترکّب اجزا.
هوای مکرمتیندن قبول فیض قیلیب
مربی چمن اولموش بهار روح افزا.
نسیم مرحمتیندن آلیب افاضۀ وجود،
جاهانی رشک جنان ائیله‌میش نسیم صبا.
صفای لطف عمیمی نفوذ ائدیب، قیلمیش،
مزاج نامییی مستعد نشو نما.
فضای گلشن لطف مراتع احباب،
حدایق ره قهری مهالک اعدا.
سُهایه لطف اگر قیلسا ذره پرورلیک،
یئتر مقام مساوات آفتابه سُها.
ور اولسا قهرینه مظهر عناصر و افلاک،
نکاح عقدین اوزر امّهاتدان آبا.
حساب رزقینی قیلمیش تمامی بشرین،
هنوز آدمه پیوند قیلمادان هوا.
بیان حالینه یئتمیش جمیع مخلوقین
هنوز پرده یه اعیانی چکمه دن اسما.
کمال تربیتی نوک خاره وئرمیش رنگ،
لطیف ائدیب، لقبین ائیله‌میش گل رعنا.
گل آتشین بیر اوج خاک رهگذاره سالیب،
کول ائیله‌ییب قوموش آدینی بلبل شیدا.
تراب درگهینه اتصال شوقی ایله
کف تضرّع دریادا، دامن صحرا.
زیارت حرمین قیلماماق جزاسی ایچون
حواله خنجر سیلابه سینۀ دریا.
جمیع وقت شفاخانۀ عطاسیندان،
جمیع خلقه میّسر، جمیع درده دوا.
رموز حکمتین ائیلر بیان مراتب ایله،
جمیع حال بشر، خواه فقر و خواه غنا.
مریض عارضۀ نقص دیر، نفوس تامام،
کیمینه فایده پرهیز ائدر، کیمینه غذا.
شریف ذات لره اوج امتحانیندان،
وسیلۀ شرف قرب اولور نزول بلا.
خسیس نفسلره گنج التفاتیندان،
مزید علت ادبار اولور وفور عطا.
دلیل ذلت وعصیاندیر تعرض حال،
طریق حسن رضاسی جمیع حاله رضا.
زهی کرم کی، نظر قیلماییب عداوتینه،
میّسر ائیله‌میش ابلیسه اعتبار بقا.
زهی کریم کی، افراط لطف و احسانی
مسیحی ائیله‌دی محراب سجدۀ ترسا.
فقیر درگهینه لذت رضاسی ایله
تعلقات طریق فنادن استغنا.
اسیر محنت عشقینه ذوق و شوقی ایله
خلاف قاعده میل طبیب و ذکر شفا.
زهی حقیقت ذاتیندالاف عقل و جنون،
قاپین مقام مساوات پادشاه و گدا.
نعیم لم یزلی اوندا کیم، سنه واصل،
معذب ابدی اول کی، سندن اولا جدا.
طواف کعبۀ وصلین تحسریله مدام،
سرود سیله صفیر و خروش رعده صدا.
مُهیمنا، صمدا! بندۀ سیه رویم،
صحیفۀ عملیم معصیت خطیله قرا.
ترحم ائت کی، منی قامت شکسته ایله
بنوشۀ چمن درد قیلدی بار عنا.
نهال گلشن دردم کی، سو یئرینه وئرر
منه همیشه جگر قانی باغبان قضا.
دریغ و درد کی، انجامه یئتدی عمر، هنوز
خراب بادۀ زرقم، اسیر دام هوا.
عذاب روز جزا وهمی ایله شام و سحر،
بیر اضطراب و عذاب ایچره یم من رسوا
کیم، اول عذابی مگر اقتضای عدل وئره
عذاب روز جزا منکرینه روز جزا.
اگرچی غصه دوتار روز شب گریبانیم،
الیمدن ائیله من امید دامنینی رها.
مقیم حجرۀ شوقم فضای قُربوندا،
همیشه سمع امیدیمده اشتیاق صدا.
کی، ای فقیر، حریم وصاله بسم الله،
تعلل ائتمه کی، دم دیر امانت اولا ادا.
سحاب فیض امل گلشنین قیلیب سیراب،
گل مرادین آچیلیب اولا مستجاب دعا.
امید وار کی، آینۀ ضمیریمدن
همیشه صیقل احسانین اولا زنگ زدا.
امید وار کی، لطفوندن اولمایا نومید،
دل فضولی آشفته حال و بی سر و پا.
میّسر اولا اونا شاهراه عشقینده
دوام حسن قبول و ثبات رسم وفا.