قوشلارا

یاواش اوچون، نازلی قوشلار،
سیزه منیم بیر سؤزوم وار:
دویدونوزسا بو یئرلردن
کیمه قالدی او یووالار؟
سیز ده، بلکه اینسان کیمی
بوراخدینیز یووالاردا
او گۆل اۆزلو بالانیزی...
یوخسا نه وار هاوالاردا؟
آمان قوشلار، من یانیلدیم،
سیزده اۆرک نور پارچاسی،
بیزده موردار یؽغینیدیر،
او محبّت کربلاسی.
سیزده هئچ بیر بابا یاپماز
بئله مۆدهیش جینایتی.
بیزیم کیمی سیزده یوخدور
آنالارین خیانتی.
گئدین، قوشلار، گئدین،
الله یاخشی یوللار وئرسین،
سیز کیمسه‌دن اینجیمه‌یین،
کیمسه سیزدن اینجیمه‌سین.
آمان قوشلار، بیلمم نه وار
بو مزارلیق عالمینده،
روحوم آیدین بیر ایز آرار
بو قارانلیق چؤل ایچینده.
وارسا سیزده آرتیق قاناد،
الله اۆچون، وئرین منه،
من ده سیزسیز غریبسه‌دیم،
اوچماق ایستر روحوم داها.
هئچ اولماسا اونو آلین،
چوخ یازیقدیر، یانینیزا،
نازلی قوشلار، سؽغینمیشام
آدینیزا، شانینیزا.

فئورال، ۱۹۱۴