دردلی سینهندهکی اسکی جؽغیرلار،
اینسان ایزلرینه بنزر، آ داغلار!
بو آغیر، اۆزوجو باخیشین منه،
قانلی افسانهلر سؤیلر، آ داغلار.
من دینلهدیم، گؤزوم، گل نیشان وئر سن -
آلتین اوردولاردان، ایگید ارلردن!
کاروانلار قونوغو کؤلگهلیکلردن،
کیملر گلیب کئچمیش، کیملر، آ داغلار؟!
هپ کئچن میلّتدن قالمیش بو اولوس،
سونرا ووروشمالار، غوغالار سونسوز!.
سن ایسترسن سؤیله، ایسترسنسه سوس،
بیلیرسن اونلاری ازبر، آ داغلار!
کئچرکن ایگیدلر کۆردن، آراسدان،
چؽخاردی سینهنده قؽلینجلار پاسدان.
فقط من آنلامام توتدوغوم یاسدان،
یوخمودور اونلاردان اثر، آ داغلار؟!
گؤردون چارپیشارکن سویلار، اویماقلار،
اویناردی گؤیلرده قانلی میزراقلار؛
صاحیبی غوغادا اؤلموش قؽسراقلار،
گؤردونمو نه یازیق کیشنر، آ داغلار!
«قاف» دئیه آنارمیش سنی هر بنده،
سانارمیش کۆجونو ایگیدلر سنده.
یئتیشمیش اولسایدیم او گۆن دربنده،
بیلردیم کیمدهدیر هۆنر، آ داغلار!
کئچرکن او جوشقون ائلخان اوردوسو،
دویدومو اۆرگین اؤلوم قورخوسو؟
اییلمهمیش باشین، سؤزون دوغروسو،
اییلن یاشاماز، اؤلر، آ داغلار.
آلتین مدنیدیر بو یوخسول اؤلکه!
نهیین سالدیرمیشدی او غربی تۆرکه؟
خزر ایگیدینین سسیدیر بلکه
کی، قالمیش قوینوندا گورلار، آ داغلار!
پوزولموش قالالار، تؤکولموش قانلار،
یالچین قایالاردان دۆشن اینسانلار،
مزار داشلاریندا اسکی داستانلار
سن وارکن شاهیدی نئیلر، آ داغلار؟!
کئچنلر سایقیسیز سامور چایینی،
ایگیدلر الیندن آلدی پایینی.
اؤلنین، قالانین بیلمم سایینی،
بلکه سن وئرهسن خبر، آ داغلار!
سابوتای آدیندا بیر کوماندانی،
گؤندرمیشدی غربه گؤیلر سولطانی.
ایگید الیندهکی موغول فرمانی،
گؤردونمو نه قوللار بۆکر، آ داغلار!
بیر گۆن گلدی: اولدو ایمانین کامیل،
کی، قورتاریر سنی قهرمان شامیل!
فلک دئدیکلری سن دئین دئییل،
نامردلر دوست یولو کسر، آ داغلار.
او زاماندان سنین دردلیدیر باشین،
آغلار گؤرونوردو تورپاغین، داشین.
او دردلی گۆنلرده یوخدو یولداشین،
یالقیزلیق ان بؤیوک کدر، آ داغلار!
بو یاخین گۆنلرده قوپدو بیر توفان،
دئوریلدی آهیندان قورولموش دؤران.
ان دار گۆنونده ده کیم ایدی قوشان،
کیم ایدی سینهسی سیپر، آ داغلار!؟
تیترک اللرییله ایختیار لزگی،
بیر مثل سؤیلهدی. دئدیم: پک اسکی.
یئنیسی باشلاندی، فقط بیتمز کی...
نهدیر بو بیتمهین جؤوهر، آ داغلار؟!
کؤیلو قؽزلارینین چاتیق قاشیندا،
نهدیر او قاینایان غم باخیشیندا؟!
او دارغینلیق نهدیر بو گنج یاشیندا؟
آچ دردلی قلبینی گؤستر، آ داغلار!
1 آپرئل، ۱۹۲۰