منو
هنر ایستر
کؤنلوم قوشو، ای گول، سنی شام و سحر ایستر
بولبول نئجه گولشنده گولو تازه تر ایستر
آشفته قیلیب کؤنلومو زولفون کیمی، گئتسین
معشوقه مگر عاشیقینی خون جیگر ایستر؟
دور ماها برابر، گؤتور اول زولفونو اوزدن
روخسارینی گؤرمک لیگی شمس و قمر ایستر
وئر اذن، دویونجا امیم، اول لعلِ لبیندن
کؤنلوم قوشو طوطی کیمی شهد و شکر ایستر
عشق آتشینه دؤزمه‌دی مجنون دا منیم تک
بو معرکهٔ عشق، حقیقت، هنر ایستر
اؤیمازدیم اونون عشقینه، بیلسه یه‌دیم ازلدن
بیگانه‌لری مندن او گول بی خبر ایستر
عاشیق کیمی گل عشقده روسوایِ جهان اول
عشق اهلی او عالمده مگر خئیر و شر ایستر؟
گؤزله، بو گؤزل، شعرلری، واحد، ایتیرمه
سندن گله جک نسل گؤزل بیر اثر ایستر