چوخ گؤزللر گؤردوم آختاردیم بوتون دونیانی من
تاپمادیم عالمده اؤز کؤنلوم سئون جانانی من
بینوا پروانه لرتک یئتمهدیم مقصودوما
عشق سؤداسیله یاندیردیم بو شیرین جانی من
نازنین، آهو باخیشلی چوخ پری لر گؤرموشم
سئومهدیم اؤز سئوگیلیمدن باشقا بیر جیرانی من
بولبول نالانییام من، بیر گول اوزلو دلبرین
نئیلرم هر لاله اوزلو غنچهٔ خندانی من
هر گولون بیر عطری وار هر غنچه نین بیر نئشه سی
اولموشام چوخ نازنین لر باغی نین باغبانی من
وار اومیدم، وصلِ جانانه یئتشسین تئز الیم
آهیله سؤندوررم آخیر آتشِ هیجرانی من
واحدم، بیمار عشقم، غئیردن یوخ منّتیم
دردیمه جانان الیله ایسترم درمانی من