مه لقالار عشقینده

چوروتدوک، عؤمروموزو بی وفالار عشقینده
بو نازلی، غمزه ساتان، مه لقالا عشقینده(١)
صداقت ایله وفا عالمینده جان قویدوق
وفادن ال گؤتورن، آشنالار عشقینده
خیال وصل ایله زنجیر ظلمه باغلاندیق(٢)
رقیبه ناز ائله ین دلگشالار عشقینده
بوکولدو بئل، باش آغاردی، قوجالتدی غصّه بیزی
بو سرو بویلو، بو زلفِ قرالار عشقینده
بیزیم نوایه گلن، نئی دن! عشقمیز چوخدر
بیز ایندی ده، گزیریک بینوالار عشقینده
بلای عشقله هر جؤره دؤزموشوک واحد(٣)
بو داش اوره کلی اولان دلربالار عشقینده

بعضی نسخه لرده،بئله یازیلوبدور:
١رقیبه غمزه ساتان، مه لقالر عشقینده .
٢خیال وصل ایله زنجیر زولفه باغلاندیق.
٣بلای عشقده هر جؤره دؤزموشوک واحد.