منو
یارب، نه بدبختم!
وئرن یوخدور نیگاریمدان نشان، یارب، نه بدبختم!
دؤنوبدور کؤ کبِ بختیم گمان، یارب، نه بدبختم!
همیشه لج، عناد ائیلر منیمله چرخِ کچ رفتار
ائدیب جؤرِ فلک قدّیم کمان، یارب، نه بدبختم!
فغان و آه و ناله مدن گلیب همسایه‌لر تنگه
گوزوم یاشی زبس اولموش روان، یارب، نه بدبختم!
انیس و مونیسیم ناله، کؤنولده محنتِ هیجران
اولوب شام وسحر کاریم فغان، یارب، نه بدبختم!
طعامیم خونِ دل اولموش، ایلاهی، گؤز یاشیم شربت
اولوبدور گولشنِ عؤمروم خزان، یارب، نه بدبختم!
جهاندا عیش و عشرت ائتمه‌دیم کامیمجا یاریملا
اوره کده قالدی بو حسرت نهان، یارب، نه بدبختم!
مریضِ بسترِ عشقم، یوخومدور، آه، درمانیم
بدنده قالماییب تاب و توان، یارب، نه بدبختم!
یئتیردی عؤمرومو باشا عبث بیهوده موهومات
گؤروم ویران اولا، کلِ جهان، یارب، نه بدبختم!
طبیبِ عشق سنسن، عشقدن واحد اولوب خسته
اولور هر آن سنه دردیم عیان، یارب، نه بدبختم!