اؤزو گلسین!

غم چکمه، کؤنول، قوی جان آلان جان اؤزو گلسین
مین ناز ائدن او سئوگیلی جانان اؤزو گلسین
صیاد اووو آختارسادا، بیر لذّتی یوخدور
لذّتلی اودور، اووچویا سهمان اؤزو گلسین
بولبول ائله ین ناله گوله چوخ اثر ائتمز
فریاده گرک اول گولِ خندان اؤزو گلسین
بیچاره قالیر عشق بلاسین چکن عاشیق
یوخ چاره سی ایسترسه ده، لقمان اؤزو گلسین
مینلرله بیزیم ایندی زولیخالاریمیز وار
ایسترسه ا گر، یوسیفِ کنعان اؤزو گلسین
جنّت ده بیزیم اؤلکه یه حسرت چکیر ایندی
منّت ایله مین حوری و قلیمان اؤزو گلسین
واحد، بو غزل تکجه ماییس چون یازیلیب دیر
قوی ایسته دیگی سئوگیلی ریحان اؤزو گلسین