منو
یئنه گلدی!
غم چکمه، کؤنول، مجلیسه جانان یئنه گلدی!
بو قالیبِ بی روحه وئرن جان یئنه گلدی!
بیر نئچه گون اولموشودو گونوم تیره غمیندن
شاد ائتدی منی، اول مهِ تابان یئنه گلدی!
آهسته ییغیب باشینا اؤز لشکرِ زولفون
کؤنلوم ائوینی ائتمگه ویران یئنه گلدی!
سال بوینوما، جانانا دئدیم، حلقهٔ زولفون
گولدو دئدی، دیوانهٔ دوران یئنه گلدی!
فرهاده دئیین، ائیلهمه سین داغدا فریاد
بو مجلیسه اول خسروِ خوبان یئنه گلدی!
قان آغلاما، بولبول، دخی گولزار هوسینده
ایامِ خزان کئچدی، گولوستان یئنه گلدی!
واحد، بیلیر عالم منی، اول زولفه اسیرم
سن چوخ دئمه، مجنونِ بیابان یئنه گلدی!