شعاریمیز بئله دیر

نیگاریلا بیزیم عهد و قراریمیز بئله دیر
شهیدِ خنجرِ عشقیک، شعاریمیز بئله دیر
گؤره نده شاد اولوروق یاری، گؤرمه سک غمگین
بیزیم خزان میزایله باهاریمیز بئله دیر
گول اوزلولر سئوینیرلر هئی آغلادیقجان بیز
بیز عشق بولبولویوک، آه و زاریمیز بئله دیر
نیگار جؤر قیلیر، بیز یولوندا جان وئریریک
بیزیم جهاندا قالان یادگاریمیز بئله دیر
بو قارا گؤرلولرین مستییک، طبیبه دئدیم
بیزیم ده عشقده رنجِ خوماریمیز بئله دیر
نه گیزلی سیرّیمیز اولسا، رقیبه سؤیله مه ریک
همیشه بیر ـ بیرینه اعتباریمیز بئله دیر
بیزیمله همدم اولان، واحد، اود توتوب یاناجاق
محبت آتشیییک بیز- دیاریمیز بئله دیر