عارف سؤزو هوشیاره دئیر

عاشیق اؤز دردِ دلین ایسته دیگی یاره دئیر
دئمز اغیارا اورک سیرّینی، دلداره دئیر
رحمسیز بیر گول اوچون بولبولِ بیچاره یه باخ
نه قدر جؤر و جفا چکسه، گئدیب خاره دئیر
عاشیق کامل اولان سیرّینی پنهان ساخلار
اینانیب یارا دئرسن، اودا اغیاره دئیر
التجا ائیله مز هئچ بیر کسه حقدن غئیری
ظلمدن تنگه گلن دردینی سرداره دئیر
بیر پرینین نه زاماندیرکی، بلاسین چکیرم
نه یانار حالیما، نه دردیمه بیر چاره دئیر
خوش او گونلرکی، سرِ زولفون اسیری من ایدیم
ایندی عالم منه هیجرینده گونو قاره دئیر
منیم احوالیمی بیر اهلِ وفا دوست اولسا
جان وئریب، جان آلان او شوخِ ستمکاره دئیر
نازنینلر نه بیلیر، عاشیقین آهیندا نه وار
ایلدیریم شعله سینه ثابت و سیاره دئیر
یئنه اول زولفو سئوردیم، گؤزلیم، قورخورام ائل:
فتنه زنجیرینه باغلاندی، بو بیچاره، دئیر
گرک اول یارا دئییم، کؤنلومو غم سئیلی ییخیب
رخنه گؤرموش بیر ائوین صاحبی معماره دئیر
قیمتِ لعلینی یارین دئمه یین اغیارا
گؤهرین قدرینی صراف خریداره دئیر
عشق سیرّین دئمه، واحد، بو قارا گؤزلولره
مست درک ائیله مز، عارف سؤزو هوشیاره دئیر