احترامینی

عارف او دور که گوزله مییه احترامینی
رسوای عالم ائیلییه ئوز ننگ و نامینی
گلدی گئدرله ثابتی تشخص قیلمایا
فرق ائتمییه رغیب ایله یارین مقامینی
یوز ایل بیزیله همدم اولوب دوزچورک ییه
بیر گونده یوز ایلین پوزاق حق و سلامینی
خلقه نشان وئره ئوزونی خادم وطن
اما دوشونمییه وطنین احتشامینی
حال اهلی ظن ائده ئوزونی روز و شب، ولی
قال ایله متصل گئچیره صبح و شامینی
هر کج نگه له همدم اولوب دوز حساب ائده
نئی کیمی سوزدل ائده رستمله سامینی
بحث کمال و عقل ائده ناقص ایکن ئوزی
چرخین هلال ظن ائده ماه تمامینی
خود کاسه لیس اولاسانا احبابی کاسه لیس
کونلوم کیمی شکسته ائده جمشید جامینی
وارلی گورنده سجده قیلا بت پرست کیمی
یوخسول گورنده دونده ره هجوه کلامینی