جمالین شمعینه، جانا، یانار پروانهلر بیر بیر
چکر زنجیرِ زولفون حسرتین دیوانهلر بیر بیر
ائدر عشاق کؤنلون جمع ایکن آشفته هر ساعت
پریلر زولفونه دگدیگجه، ای دل، شانهلر بیر بیر
یئنه بیلمم نه افسون ائیلهمیش جادویِ چشمانین
که دگمیش بیر بیرینه مردم فرزانهلر بیر بیر(١)
نه مئی دیر، گؤزلرین قوربانی، بیلمم بادهٔ عشقین
کی، ایچدیکجه تاپار هشیارلیق مستانهلر بیر بیر
لبین اؤپمک خیالیله دلِ ساغر اولوب پر خون
اول حسرتله گزر الدن اله پیمانهلر بیر بیر
دهانیندن اثر یوخدور، دئمیشلر، شرطی وار، آما
یئتر تحقیقینه شرح ائتسهلر فرزانهلر بیر بیر
عرق دیرمی دوزولمش عارضِ آلیندا سر تا سر؟
گول اوزره شاله دیر، یا اینکی اول دوردانهلر بیر بیر
مذاقِ لعلینی گؤرمشله، دئرلر جامِ مئی ایچره
شرفیاب اول جهتدندیر اولوب میخانهلر بیر بیر
آییلماز جهل اهلی، واحد، هر گز خوابِ غفلتدن(٢)
مگر اهلِ ریادن ترک اولا افسانهلر بیر بیر
١بیت بو شکلیده ده قئید اولموشدور:
یئنه بیلمم نه افسون ائیلهمیش جادویِ چشمین کیم
دگیبدیر بیر بیرینه مردمِ فرزانهلر بیرـ بیر
٢مصرع بو شکلیده ده قئید اولموشدور:
آییلماز مسجد اهلی، واحد، هر گز خوابِ جهالتدن