پروانه یم سنه!

جانان، نه ائتمیشم، بئله بیگانه یم سنه؟
مجنون اولان دامن ائوی ویرانه یم سنه!
یوزلرله نازلی یار اولا، کؤنلوم سنینله دیر
اولسان نه یئرده، من یئنه همخانه یم سنه
جانان دا بؤیله جؤر ائدر اؤز مبتلاسینا؟
سن ظلمکارسان، دئمه جانانه یم سنه
شؤق لبینله ائیله یه لی باده ترکینی
سرمست گؤزلرین کیمی مستانه یم سنه
آنجاق کمندِ عشقه گرفتار اولان بیلیر
زولفون غمینده من نئجه دیوانه یم سنه
گؤسترمه گول جمالینی، یاندیرما کؤنلومو
قوی بیلمه سینلر، عشقده پروانه یم سنه
عشقونده گرچی ائل منی مجنون حساب ائدیر
مجنون دا اولسام، عاشیقِ فرزانه یم سنه
عشق عالمینده من ده صداقتلی واحدم
هر بیر ایشیمده دوغرو و مردانه یم سنه