انشاء الله

یار، ایشیتدیم ائده جکدر سفر، انشاء الله
گؤروم اولسون سفری بیخطر، انشاء الله
وار اومیدیم، نه قدر ناله ائده م، بولبول تک
اولور حالیمدان او گول با خبر، انشاء الله
نولا، شب ایتمه‌دی تأثیر او مهه آهم اودو(١)
ایده جک صبح، یقیناً، اثر انشاء الله
غئیره بیرسؤز دیمرم کی، سببِ آهیم اولوب
دوشر آهیمدان ائوینه شرر، انشاء الله
در میخانه نی سیندیردی کیچن شب زاهید
دوشه جکدیر، بیلیرم، دربدر، انشاء الله
بو قرار ایله نیگاریمله من عهد ایله‌میشم
اولماسین بیرده آرادا کدر، انشاء الله
چکمیشم هیجرینی، اومیدِ وصال ایله خوشام
زحمتیم اولمایاجاقدیر هدر، انشاء الله
من تریا کی مزاجم، اولا یوز کاسه زهر
گر ایچم ده، منه ائتمز ضرر، انشاء الله
واحدا، فرصت ایکن، هر نه ایشین وار گئجه گؤر
سحرین فکرینی قیللیق سحر، انشاء الله

١مصرع بو شکلیده ده قئید اولموشدور:
ائتمه‌دی آهیم اودو تأثیر او ماه گئجه لر