منو
دلبریم!
هیجرین یئتیردی عاشیقینی جانه، دلبریم
جانلار فدادی سن کیمی جانانه، دلبریم
چوخداندی، حسرتم سنین اول مه جمالینا
گللم غمیدن هر گئجه افغانه، دلبریم
هر دم دوشنده یادیما اول غنچه لبلرین
بالله، دونور بو غملی کؤنول قانه، دلبریم
عشقین سالیبدی بوینوما زنجیرِ زولفونو
اوللام بو راهِ عشقده دیوانه، دلبریم
یاندیم شرارِ آتش عشقینده روز و شب
اولدوم او نارِ عشقینه پروانه، دلبریم
مدتدی، تشنه یم سنسن او لعلِ نابینا
بیر بوسه لطف قیل منِ عطشانه، دلبریم