نه دئدین بس

مندن، کؤنول، او نازلی نیگارا نه دئدین بس؟
چکدین او گول اندامی کنارا نه دئدین بس؟
اوّل بونو بیلدیم کی، دئدین عاشیقین اؤلدو
اوندان سورا اول شوُخا دوباره نه دئدین بس؟
من مست ییخیلدیم اودلارامی گؤره ن تک
ائولر ییخان او چشمِ خوُمارا نه دئدین بس؟
مئیدن می قیزارمیشدی اونون عارضِ آلی
زینت وئرن اول باغِ باهارا نه دئدین بس؟
من خستهٔ عشق اولدوغومو سوردومو سندن
گؤستردی می بیمارینا چارا نه دئدین بس؟
داغِ غمِ هیجرانه نهایت وئره جک می؟
بو باره ده اول لاله عذاره نه دئدین بس؟
دردیندن اؤلن واحدی هئچ بیر سوروشورمی؟
اول بیکسی کیم قویدو مزاره، نه دئدین بس؟