منو
ائل شاعیری
منم ایستکلیم او اوچ نازلی گؤزلدن بیریدر
همی گؤیچک، همی اون یئددی یاشیندان ایریدر
بئله بیر دلبر اوچون جان وئرن عاشیق اؤلمز
بخته وردیر، او بو دونیادا یاشادیقجا دیریدر
نه جفا ائتسه گؤزللر منه عیب ائیله‌مه یین
او منیم قانا دؤنن کؤنلومین اؤز تقصیری دیر
جان فدادیر ائله جانانا وفا اهلی اولا
بی وفا اولسا گؤزل عاشیقین عؤمرون چورودیر
بیلمه دیم، یار اوچون اغیارا گئدیب یالواردیم
دئدیم، ای دل، دؤنه سن قانا، بو منت یئریدر؟
ائل یغیلدی، او کؤنول باشینا، پروانه کیمی
ائله بیلدیم، گؤزلیم عشق، محبت پیری دیر
ساده دیلده بوقدر، اینجه غزل لر کی یازیر
بو یئتر واحدین حقینده کی: ((ائل شاعریدیر!))