مهمان اولارام می؟

بیرده گؤره سن، نایلِ جانان اولارام می؟
عشقینده اونون بولبولِ خوش خوان اولارام می؟
مینای سرِ کوینی مین دفعه دولانسام
بیر یول، گؤره سن، لایق قوربان اولارام می؟
یوز جؤر ائله سن، بیر دئمرم جؤررونو آز ائت
مین بؤیله جفا اولسا پئشیمان اولارام می؟
سینه م بو قدر یاره له نیب غمزه ن اوخوندان
آخیر، گؤره سن، قابلِ درمان اولارام می؟
دیندیر منی بیر نازایله، ای غنچه ـ اومیدیم
بیر گون آچیلب گول کیمی خندان اولارام می؟
چوخلار یئتیشیب کامه، اولوب خادمِ کویون
من ده او حرمخانه یه مهمان اولارام می؟
واحد، او قارا زولفه کی، حسرت چکیرم من
او زولفه الیم یئتسه، پریشان اولارام می؟